"Prosjekt Eplesaft"
Sjølv korte turar er ikkje alltid lett for små føtter. Då er det godt å ha løysingsorienterte vaksne med seg.
For ein månad siden starta Søre Øyane Naturbarnehage med aldersinndelte grupper, med faste aktivitetar og turdagar.
Dei ferdast både i skogen og til sjøen to gonger i veka.
Epletre gjorde susen
Tolv to-åringar har fast turdag i skogen uansett vêr.
- Turen vi går er ikkje lang, men å gå i ulent terreng kan vera nokså strevande for små kroppar, fortel pedagogisk leiar Monica Røttingen Møller.
Å lokka med eit epletre i enden av turen fann dei ut gjorde susen.
- Sjølv om epla var sure som berre det, er borna like ivrige kvar veke og meistringskjensla var på topp.
Med mål og meining
Det var då dei vaksne fekk ein idé om å lage eplesaft saman med borna, og i førre veke var prosjektet i gang.
Måndag var det tid for eplesanking. Alle borna, like målbevisste, gjekk utan støtte denne dagen.
- Ungane plukka ivrig før vi gjekk tilbake til barnehagen for å laga "satsen" som dei kalla det, fortel Monica.
Blandinga skulle stå i 3-4 døgn og torsdag var det ein spent gjeng med store og små som skulle sjå korleis det hadde gått.
"Satsen" vart godkjend
Det var ikkje ein lyd rundt bordet då safta blei fyllt i glassa.
Borna likte safta, nokre drakk fleire glas, og resten av barnehagen fekk også smaka på verket deira.
- Prosjektet har gjeve ungane mange nye inntrykk og vi vil visa at sjølv om dei er små så kan dei klara mykje, seier Monica, som er freista til gjentaking av "Prosjekt Eplesaft"-suksessen.