Her i Rødsliane har det rast ut rot og stein to gongar dei siste fem vekene. (Foto: KVB)

Ras, ungdomsfyll og ei kjempestor and

Politiet fortel om ein roleg, men litt merkeleg 16. mai i Os.

Av: Kjetil Vasby Bruarøy

Fredag fekk politiet melding om ein stein som hadde rast ut i Rødsliane.

Trafikken kom seg forbi og steinen blei raskt fjerna.

Det er berre fem veker sidan ei stor rot raste ut på same vegstrekket.

Ungdomsfyll

16. mai er for mange ein god dag å ta seg ein fest, men politiet i Os opplevde gårsdagen som roleg.

– Vi fekk melding om ei ung dame som virka full, og som dreiv og bada gjentatte gongar på Søre Neset i 23-tida, fortel politibetjent Jonsrud.

– Patruljen rykte ut og fann det heile som OK. Jenta virka pigg og storesøstera var der og passa på.

I 00.30-tida sjekka politiet ut ein gjeng med ungdomar som hadde fest i Øyane.

– Dei var under 18 og virka litt påverka. Foreldre blei kontakta og ungdomane sendt heim.

Fann kjempestor, oppblåsbar and

Klokka 02.45 fekk patruljen eit merkeleg syn i Os sentrum.

– Det låg ei gigantisk and utanfor Rimi.

– Det var ei stor, gul, oppblåsbar and, for stor til at vi kunne ta den med oss nokon stad, så den blei liggande.

– Vi reknar med at den som eig anda hentar den igjen.

 

Fleire saker