Reagerte på signering

Torsdag kveld blei det kjent at Lysekloster har signert kontrakt med André Pouca Roupa de Matos.

Då Hordalandsfotball delte Midtsiden si omtale av signeringa, kom dagleg leiar i Øystese IL, Roger Vassnes, med følgjande kommentar:

«Sidan Matos har kontrakt med Øystese reknar me med at Lysekloster snart tek kontakt med klubben og forhøyrer seg om kontraktssituasjonen hans».

Då Midtsiden kontakta Vassnes torsdag kveld, stadfesta han at Matos har amatørkontrakt med klubben.

– Han har vore hos oss sidan 2015 avbroten av ein 6-månadars periode i Fana i år. Han har kontrakt til 2020.

– Vi har ikkje fått nokre signal på at han ikkje er med oss vidare, og eg blei overraska då eg såg artikkelen på Midtsiden som fortalte at han har signert ny kontrakt.

Lysekloster legg seg flat

Sportsleg leiar i Lysekloster, Svein Kollen, seier Matos har signert proffkontrakt med Lysekloster ut 2018, og at dette må vera ei misforståing. Han viser vidare til hovudtrenar Ruben Hetlevik, som har hatt med overgangen å gjera.

– Vi var i dialog med Fana om overgang i sommar, men då kom vi ikkje i mål. No etter sesongstart så har vi fått høyra av både folk rundt Matos og av Matos sjølv at han er klubblaus, seier Hetlevik.

Då Hetlevik sjekka i Fiks-registeret såg han at Matos sto med amatørkontrakt i Øystese. Ein proffkontrakt overstyrer normalt ein amatørkontrakt.

– Men kvifor det ikkje er sendt brev til klubben, eller har vore dialog, veit eg ikkje. Vi plar vera veldig nøye på dette, og er opptatt av at det skal gjerast skikkeleg, seier Ruben, før han ringer til Vassnes for å diskutera saka.

– Vi beklager på det sterkaste at det her har skjedd ein glipp i dei interne rutinene våre.

Vil ha kompensasjon

Etter at det no har vore dialog mellom klubbane seier Hetlevik at dei skal møtast og bli einige.

På spørsmål om dei vil lata Matos gå seier Vassnes at Øystese ikkje vil hindra spelarar som ikkje er motiverte for å halda fram.

– Det er uansett ikkje bra for laget. Men Matos er blant våre beste spelarar, og sjølv om vi ikkje har dei same høge målsetnadane som Lysekloster, så er vi avdelingsmotstandarar neste år, og det er tungt å mista han.

– Vi vil òg ha dekka ein del av utgiftene vi har hatt med spelaren. Om det stemmer at Lysekloster har signert proffkontrakt, så er det jo greit. Matos er under 23 år, så då blir det automatisk utløyst rett på utdanningskompensasjon, seier Øystese-sjefen.