Redd for blåmandag
Rådmannen er redd det blir ein kommunal blåmandag når kommunane frå nyttår skal dekka større del av spesialisthelsetenesta.

Då rådmannen presenterte framlegg til budsjett 2012 for kommunestyret førre veke uttrykte han ei stor uro for kostnadane knytt til den sokalla Samhandlingsreforma.
Os kommune får overført 17,5 millionar kroner frå Staten for å dekke dei auka kostnadane som kommunen før som følgje av reforma.
- Eg er redd samhandlingsreforma kan bli ein blåmandag for kommunane, sa rådmann Knut Terje Rekve i møtet.
Alltid vore underfinansiert
Rådmannen byggjer si frykt på mange års erfaring frå rådmannstolen i fleire kommunar.
- Eg har lang erfaring frå dette no. Dei store statlege reformane som har kome gjennom åra har alle vore underfinansiert og kommunane har fått rekninga, fortel Rekve då Midtsiden.no ber han utdype kvifor han er skeptisk.
- Vi har rekna oss fram til at i allefall 11,2 av dei 17,5 millionane som kjem i overføringar knapt nok kjem innom kommunekassa før dei går ut att for å finansiera spesialisthelsetenesta.
Andre avgjer pengebruken
Eit moment som gjer at kommunen er usikre på kor stor del av midlane som må overførast helseforetaka er at dei berre får eit finansielt ansvar.
- Definisjonsfullmakta (ansvaret) for å avgjere kva tenester som skal bli gitt pasientane skal framleis ligga hos helseforetaka. Vi som kommuen har ikkje noko påverknad på dette og må berre ta rekninga for det helseforetaka bestemmer, forklarar Rekve.
I budsjettframlegget uttrykk han uroa slik:
«...Vi får vone at målet med Samhandlingsreforma er noko anna enn å finansiera sjukehusa på ein meir komplisert måte. Om ikkje, kan dette verte ei kostbar utfordring for kommunane...»
Må betala for utskrivingsklare frå dag 1
I tillegg til å ha eit medfinansieringsansvar for ein del av dei medisinske pasientane som vert lagt inn i sjukehus får no kommunen ansvaret for dei utskrivingsklare pasientane frå dag éin. Om kommunen ikkje klarar å ta i mot dei utskrivingsklare pasientane får dei ei rekning på 4000 kroner per døgn per pasient.
- Os kommune har vore flinke, samenlikna med mange andre kommunar, i høve til å ta i mot utskrivingsklare pasientar etter dagens ordning, men det ligg store forventingar i reforma om at kommunane skal vera enda raskare til å ta i mot pasientar etter nytt år.
Ikkje vera først
Noko av bakgrunnen for reforma er å tvinga kommunane til å ta eit større ansvar for folkehelsa og førebyggje behovet for spesialisthelsetenester.
Reforma gjev kommunen moglegheiter til å utvikla tenestetilbodet i kommunen om ikkje alle pengane går til å medfinansiere helseforetaka.
- For oss blir det viktig å ikkje væra først ute, men byggje på erfaringar frå eigen og andre kommunar.
Os kommune arbeider allereie med prosjekt som observasjonssenger, KOLS/diabetes team, kreftsenter og folkehelsearbeid.
- Det blir viktig å sjå på korleis dette arbeidet konkret kan gjennomførast og integrerast i dei eksisterande tenestane våre.
- Samstundes må vi ha god kontroll på dei økonomiske forholda mellom kommunen og spesialisthelsetenesta, avsluttar rådmann Knut Terje Rekve.