Redda dagen

Bildeserie:

1 av 4

Os - Bjarg: 3-1 (1-0).
Os sine mål: Tim Henrik Sperrevik (9), Christer Olsen (80,87)
Gule kort (Os): Sperrevik, Valvik

Os starta med: Halvard Enes, Tony Skarvatun, Einar Algrøy, Per Søgnen Merai, Remi Osebakken, Stian Lunde, Tore Valvik, Preben Borgen, Andreas Bjørnen, Torkel Hjertnes og Tim Henrik Sperrevik.
Byte: Vegard Leikvoll Moberg for Bjørnen (55), Christer Olsen for Skarvatun (75) og Anders Glesnes for Borgen (87).

Under artikkelen kan du sjå bilde av dei fire skåringane.
HER KAN DU SJÅ SKÅRINGANE SAMAN MED FLEIRE BILDE FRÅ KAMPEN

Bjarg er nyopprykka, men låg likt med Os og Tertnes i poeng før 6. runde. Os hadde venta seg eit lag som la seg bakpå, medan gjestane etter 1-0-skåringa til Os viste både vilje, innsats og teknikk som gjorde at heimelaget måtte ta seg saman.

- Vi tok for lett på det etter at vi skåra, og spelarane gjorde mykje kvar for seg, seier trenar Frank Hellevik.

"Ikkje bli for deilig" ropte han til spelarane fleire gongar i første omgang. Å halda ballen for lenge og slå upresise pasningar straffa seg nesten i dag.

La om etter 1-1
Os starta første omgang bra, men var ikkje heilt på etter skåringa, og starta heller ikkje heilt bra i andre omgang. Ein corner ti minutt ut i omgangen blei stussa vidare og gjekk via leggen til Tim Henrik og inn bak Enes.

- Det var frustrerande. Vi SKAL ha tre poeng heime, så vi la om til tre bak og gjorde nokre byte.

Vegard Leikvoll Moberg kom inn for Bjørnen og angrepsspelar Christer Olsen kom inn for høgreback Skarvatun. Os byrja å skapa fleire og fleire sjansar, og Olsen sørgja for 2-1-leiing etter eit fint løp og eit godt skot i 80. minutt.

- Tim var vår beste spelar i dag. Han er i kanonform, og jobba hardt heile kampen. I tillegg var Stian Lunde som vanleg god, og Vegard og Christer har grunn til å vera nøgd med sine innhopp.

- Sett bort frå det hadde vi god innsats, men langt frå ein maksdag i dag, meiner Hellevik.

Bjarg nøgd
Bjarg, som har starta sesongen i ny divisjon bra, leverte også godt i delar av kampen mot Os.

- Eg er nøgd. Vi har unge spelarar, fleire av dei har berre spelt på gras to gongar før, då er det klart at dei blir trøytte mot slutten.

- Spelarane er også nøgde med eigen innsats. Dei liker ikkje å tapa, men forstår at det er eit topplag dei har spelt mot i dag, seier Bjarg-trenar Morten Damhagen.

- Bør laga luke før sommaren
Os har no vunne fem av seks kampar, berre Løv-ham 2 på heimebane blei for sterke, på ein dag Os ikkje leverte 100 prosent. Førre fredag slo Os Hovding 5-0 på bortebane, i dag tok dei sin fjerde siger på rad.

- Det var litt rufsete i dag, men når vi spelar som vi skal så er vi gode, seier Tim Henrik Sperrevik.

Han meiner Os er stabile nok til at dei bør halda fram med å vinna, og han spår at dei har ei luke bak til resten før sommaren.

- Odda, som er sterke på heimebane, blir kanskje tøffe i neste runde, og før sommaren møter vi både Tertnes og Voss. Men eg kan ikkje sjå for meg noko anna enn at vi kjem til å ligga heilt i toppen heile sesongen.

SJÅ TABELL