Reduserer eigedomsskatten

Fellesnemnda for Bjørnafjorden kommune skulle torsdag handsama spørsmålet om å oppretta eit ad-hoc utval for avvikling av eigedomsskatt i Fusa i samband med kommunesamanslåinga.

Den saka blei utsatt, men i staden blei det ein diskusjon som enda med at fleire av Fusa-politikarane forplikta seg til å redusera eigedomsskatten med éin promille i kvart av dei to neste åra.

Før det hadde Marie Bruarøy (H) foreslege at ein skulle senda ein søknad til fylkesmannen om å få utsett frist for samordning av eigedomsskatten til 2022, noko som kunne ha gitt ein urettvis situasjon frå 2020 til 2022 med eigedomsskatt i berre delar av kommunen. Politikarane valde difor å ta ei pause og gruppemøte.

Forplikta seg til to promille

Tilbake frå gruppemøtet kom Magne Djuvik (Frp) med ei skisse til løysing.

– Skissa er at Fusa-politikarane forpliktar seg til å ta ned eigedomsskatten på hus og heim med éin promille i 2018 og éin promille i 2019. Det kan eg lova på vegne av meg og mine. Då sit vi att med omlag 6 millionar som Bjørnafjorden kommune må ta i 2020, sa Magne Djuvik (Frp).

Fusa kommune har i dag omlag 14 millionar kroner i inntekt frå eigedomsskatt.

Fekk støtte

Djuvik fekk støtte til skissa.

– Det har Fusa høgre inga problem med å støtta. Eg trur det signalet vi hadde sendt til innbyggjarane i Fusa med å gå for framlegget frå Bruarøy hadde vore eit dårleg signal, sa Lars Erik Dalland (H).

– Det er noko som heiter å skrifta. Det vi diskuterte er heilt rett. Vi jobbar for å få til det som Magne Djuvik sa. Det må protokollerast at det er ein del av oppdraget for ad-hoc utvalet, supplerte ordførar i Fusa, Atle Kvåle (Ap).

Mikael Leigland (Sp) var ikkje like tydeleg i si støtte.

– Det står at det skal samordnast, og då skal vi tilpassa på vår side, på lik linje med at de i Os skal tilpassa avgiftsbudsjetta til våres. Dykk har tre ganger så høg tilknytningsavgift som Fusa i dag. Vi skal ta innover oss det som vi har diskutert og gjera vårt ytterste for å tilpassa så godt som mogleg, sa Leigland.

– Eg føler eg ikkje fekk ein så tydeleg stadfesting frå Leigland som eg håpa på, men det var tydeleg nok frå Djuvik om Fusa sine forpliktelser til éin promille i 2018 og éin promille i 2019, så skal Bjørnafjorden kommune få brynt seg på resten. Eg trekk difor framlegget mitt, konkluderte Marie Bruarøy.

Ingen skal seiast opp

Helge Steinum (Ap) var uroa for kva konsekvensane vil bli at ei reduksjon av eigedomsskatten umiddelbart.

– Det høyrest bra ut dette, men er det gjennomførbart. Det sit ein rådmann på hjørnet her som har skreve eit budsjett som då kanskje må skrivast om, eller vil det gå utover tenestene i Fusa. Intensjonen må vera at det ikkje skal gjera det, det ligg i intensjonsavtalen, påpeika Steinum.

– Det er klart det som vi har sagt i intensjonsavtalen om at ingen skal seiast opp på grunn av kommunereforma. Det vi snakkar om no er ein del av kommunereforma. Det blir ein utfordring for oss Fusa-politikarar, men eg vil signalisera til dei tillitsvalde om at dette nedtrekket ikkje skal redusera i nedbemanning, for dette er ein del av kommunereforma, svara Atle Kvåle.

Laila Reiertsen (Frp) avrunda debatten med å takka Fusa-politikarane.

– Takk for at de sender så gode signal. Eg skjønner det ikkje er enkelt, men takk skal de ha.