Regntung start
Det har vore ei lang tid med fint og tørt vêr i Os. Arrangørane av Nore Neset dagane og Osmessa hadde nok håpa at det kunne ha vart litt lenger.
Bildeserie:
Denne helga er det Osmessa og Nore Neset Dagane i og utanfor Nore Neset Aktivitetshus. Dagane er fylt med aktivitetar som gatecup, hoppeslott, Liafjellet opp, opning av musikkbinge, underhaldning og mange gode tilbod frå messebodane.
Men det blei ein grå start laurdag og regnet hølja ned. Det stoppa ikkje fotballglade born i å spela gatecup, eller born og vaksne å løpa opp Liafjellet, men uteområdet var nok meir tomt enn ved tidlegare arrangement.
Ein av utstillarane som står utandørs er Bjørn Aase frå Safe-Way.no. Han stiller for første gong ut el-syklane og ståhjulingane sine på Osmessa.
– Eg har selt to syklar til no, men det blir nok endå kjekkare i morgon når godvêret kjem, seier Aase.
Selde eigne leikar
Innandørs var det tørt og varmt, også der hadde utstillarane mykje spennande å by på. Nytt i år er Barnas Bruktmarked der fleire born sat klare for å selja leikar dei ikkje lenger hadde bruk for.
Ein av desse var Aksel på 11 år. Han hadde fått selt fleire ting, blant anna ei borg og ein leikepistol.
– Det har ikkje vore vanskeleg å finna ting å ha med, eg hadde mykje eg ikkje brukte.
– Og det er veldig kjekt å selja dei, fortel han.
Populær flettemamma
Ein annan stand der det vrimla med folk er hos Bente-Helen Schei, også kjent som Flettemamma, som var på messa for første gong.
Her sto jentene i kø for å få flotte fletter med band i ulike fargar.
– Det er veldig travelt, eg har ikkje hatt tid til pause enno og har 15 jenter i køen, seier Schei, som for tida også er opptatt med å laga ei flettebok.
Tatoverar med airbrush
Det er litt rolegare på standen ved sidan av. Der sit Ingrid Valencia frå Kids Tattoo i Åsane.
– Eg reiser rundt på messer, bursdagar og andre event og tatoverer, noko som plar vera veldig populært, medan her har det vore litt rolegare enn vanleg.
– Tatoveringa blir airbrusha på, er heilt ufarleg og varer i om lag ei veke, avhengig av kva hudtype ein har, fortel ho.
Valencia blei imponert over Osmessa, som er mykje større enn ho hadde trudd.
Sundag kjem godvêret
Hallen i Nore Neset Aktivitetshus er fylt med ulike firma og privatpersonar frå ulike bransjer. Her kan du få tak i utstyr til hus hage og kjøretøy, interiør, mat, godteri, sportsutstyr og mykje anna.
Osmessa og Nore Neset dagane held fram sundag, og då ser det ut til at vêrgudane kjem til å spela på lag. Det er meldt sol og sky, ingen nedbør og 12 gradar.
Den siste dagen av messa kan ein oppleva show med tryllekunstnaren Andini, musikkbinga skal bli dekka med grafitti-kunst, det blir natursti og skate-oppvisning for å nemna noko. Og sjølvsagt held utstillarane på messa fram i hallen mellom klokka 11 og 16.