Rekordbra sommarløp
Det lover bra for Sverre Lunde Pedersen sin første sesong som senior.
Osingen Sverre Lunde Pedersen frå Fana IL, som fylte 20 år i juli, har gått for fullt som seniorutøvar dei siste åra, men var junior fram til i vår.
– Den største forskjellen blir at eg ikkje skal gå junior. Det tok på å delta både i junior og senior, eg merka det spesielt i slutten av sesongen, seier Sverre til Midtsiden.
I år blei han første nordmann til å vinna junior-VM allround to år på rad. No har han hatt ein skadefri og god sommar, noko som gav utslag i svært god tid under sommarløpet i Vikingskipet laurdag.
3.48,56 er Sverre si tredje beste tid på 3000 meter nokosinne, og den beste tida i ei sesongoppkjøring.
– Eg har alltid gått sommarløpet, men aldri på ei så god tid.
Sverre, som bortsett ifrå å ta eitt fag no er fulltidsløpar, har i sommar vore på treningssamlinger i Frankrike, Finland, Tyskland og på Hamar.
– I neste veke reiser eg til Frankrike igjen. Der kjem det til å gå mykje i rulleskøyter, men også noko kortbane på is. Så går turen til Hamar for å stå på is før nye løp i oktober, seier Lunde Pedersen.
Verdscupen startar i midten av november.