RIB frå Askeladden

Bildeserie:

1 av 6

I fjor kom andre båt i Askeladden sin Commuter-serie, og Commuter 11 blei nominert til den europeiske prisen ”Powerboat of the year”.

Sommaren same år starta planlegginga av Commuter 10, ein RIB som kan riggast både som ambulansebåt, politibåt eller brannbåt.

- Eller slik denne første båten i serien er utstyrt, som ein røff fritidsbåt for avanserte brukarar, seier marknadsjef hos Askeladden Boats AS, Leif Bergaas.

Lansering i dag
Askeladden Commuter 10 RIB blir stilt ut for første gong på messa Båter til Sjøs i Arenum denne helga.

Dette er den første lanseringa av ny båt sidan Askeladden Boats AS overtok fabrikken.

Utprøvd skrog
Commuter 10 RIB er som dei andre i serien bygd på Model Art i Polen. Sundag kom båten til Noreg og Os.

- Dette er eit heilt nytt konsept, eit samarbeid med Model Art der vi har bygd båten på eit velutprøvd RIB-skrog dei har utvikla for ei tid tilbake, fortel Bergaas.

- Det var litt tilfeldig at vi oppdaga at Commuter 8 sitt styrhus passa omtrent perfekt på skroget dei hadde, og så starta planene med tilpassing og innreiing.

Luftig testtur
Onsdag var Askeladden-teamet på prøvekjøring utanfor Møgster, og leiinga er svært nøgd med korleis Commuter 10 oppførte seg i sjøen.

- Det var gode bølgjer og det gjekk fort! Båten takla forholda veldig godt, så det ser ut til å vera god balanse og rett tyngdepunkt på overbygg og øvrig innreiing.

Over 700 hk
I RIB-en kan du velja mellom enkel- og dobbel innanbords motor, vassjet eller påhengs. Båten kan utrustast med maks 900 hestekrefter.

- Denne båten har 2 x 370 hk diesel frå Volvo, med Aquamatic, DPS og twin joystick-kontroll. Med stikka styrer vi begge aggregata uavhengig av kvarandre, slik at vi for eksempel kan kjøra sidelengs.

Båten gjorde rett over 49 knop med 740 hestekrefter.

Politi- og redningsbåt
Med RIB-en rettar Askeladden Boats seg mot ein ny marknad – båten kan innreiast med utstyr som gjer den eigna til både å sløkkja brannar, tranportera dykkarar eller arrestera syndarar på sjøen.

- Det blir spennande for oss å sjå korleis den profesjonelle marknaden tar imot denne nye RIB-en.

- Offentlege instansar som politi og brannvesen skiftar båtar med fast intervall, ofte på leasingavtale, og dette med finansieringsløysingar er også noko vi med samarbeidspartnarar kan løysa, seier Leif Bergaas.

Tekniske spesifikasjonar
Designkategori: B
Lengde 9,70 m
Breidde 3,16 m
Djupstikk 0,80 m
Vekt ca. 5000 kg
Maksfart 49 knop med 2 x 370 hk
Marsjfart ca 45 knop
Tubediameter 0,58 m
Tal på kammer i tube 7
Tubemateriale: Hypalon med gummifender
Drivstofftank: 2 x 300 l
Motorstyrke: Maks 900 hk
Pris (med utstyr som første båt): 2,9 millionar kroner

- Commuter 10 blir tilpassa kva kunde og bygd på bestilling, som ved verft for større båtar. Vi har også sett opp eit eige suppurt- og salsteam for å ta hand om Commuter-kundar, seier Bergaas.