Riggar til Tour på Osøyro

I dag er det, for tredje gong, klart for Tour of Norway for Kids i Os sentrum.

Les òg: Tar touren til Os igjen

– Vi starta touren 9. mai. I går hadde vi ein kjempedag med 400 syklistar på rådhusplassen i Haugesund, seier prosjektleiar Eirik Thorgersen.

– Dette er arrangement nummer 47 av 50. Det følest som om vi starta i går og det er vemodig at det snart er over, synest Thorgersen, som har prosjektleiaroppgåva som fulltidsjobb, året rundt.

Sykkelklubben i Os, CK Henie, er på plass med mannskap som hjelper til med rigging.

– Med så mange arrangement er vi avhengige av hjelp frå lokale klubbar, og det er ein veldig fin gjeng frå CK Henie som hjelper til.

– Får vi litt hjelp av vêret òg, at det lettar litt, så trur eg det blir tett med syklistar her når starten går klokka 14, seier Eirik.

Rittet er gratis å delta på og har eigne klassar frå trehjulsykkel og opp til 14 år.

Alle deltakarar får premie, i tillegg blir det trekt ut ein vinnar av ein barnesykkel av merket Merida.