Ro-karar utfordrar spelemenn
Os Rockeklubb utfordrar Os spelemannslag til ro-kamp under oselvardagen. Dei oppfordrar også andre lag og bedrifter til å utfordra kvarandre.
Då kulturkonsulent Kjetil Osablod Grønvigh fekk ansvaret for kystsogedagane, som Oselvardagen er ein del av, fekk han høyre om heller dårleg deltaking i kapproinga med oselvarar.
Sidan han òg er engasjert i rockeklubben tenkte han at kvifor ikkje få med ein av dei andre rockerane og utfordra ei anna frivillig forening.
– Andreas Lindborg stiller som lettmatros, eg som tungmatros.
– Vi må jo utfordra nokon i same sjanger, så vi håper Os spelemannslag tar utfordringa, seier ein offensiv rocke-roar.
Finn dei takta?
Både Kjetil og Andreas er trommeslagarar i fleire band.
– Det blir jo spennande å sjå om vi som to trommisar finn takta eller om vi berre hamnar i mot-rytmar.
– Ingen av oss har noko særleg erfaring med båt og oselvarar. Eg måtte rett nok ro ein frå Hatvik til Bjånes då påhengsen streika for mange år sidan, men det er det einaste.
– Då har eg meir erfaring, eg har lagt bak ein robåt i ein gummring på Vindalsvatnet, gliser Andreas Lindborg breitt.
– Kjem desse forresten med lydanlegg?
Fonos er med
Dei to rockerane håper mange lag, organisasjonar og bedrifter tek utfordringa laurdag om vel ei veke. Terskelen for å delta er låg.
– Eg veit at Fonos er med, kven av dei andre kora dei utfordrar eg er ikkje sikker på.
– Vi har òg fyrt opp IKT-eininga i kommunen, der er det nokre ekstreme konkurransemenneskjer, så eg reknar med at nokon tek utfordringa deira.
– Ellers hadde det jo vore gøy å sjå Marie Bruarøy og dei frå Guris Frisørsalong mot Lena Stigen Mathisen og dei på Toppen.
– Andre bedrifter som burde utfordra kvarandre er jo Solsiden og Catten, Bjørnefjorden Gjestetun og Solstrand, Båtens Beste og Askvik Maritim og ikkje minst dei fire treningssentra som no finst i bygda, ler dei to rockarane.
Os vs Lysekloster, Venstre vs Frp?
Andre opplagte battles dei to ser for seg er ikkje uventa Os Turn Fotball mot Lysekloster.
– I tillegg har vi jo dei politiske partia. Venstre og Frp har jo utfordra kvarandre om ordførarstolen, så Jon Sivert Rykkel og Terje Søviknes bør jo sitja i kvar sin båt.
Tek de utfordringa, eller er det andre lag og organisasjoner som tek ho, så er det berre å melda seg på til kultureininga i Os kommune.
– Oselvar laget stiller med båtar, årar og redningsvester, så det eineste ein treng er to til å ro og sjølvsagt ein durableg heiagjeng, avsluttar Kjetil Osablod Grønvigh.