Romjulsprat med Mats Cato Moldskred

Gjennom romjula har vi hatt ein prat med eit knippe kjente ansikt i Os, basert på formatet på «Fredagsportrettet», som var fast spalte på Midtsiden for 15 år sidan. I dag byr vi på toppskårar for Os i 2018-sesongen, Mats Cato Moldskred.

Om Midtsiden spanderte reisa, kor ville du tatt turen (ein stad du ikkje har vore før)?

– Seychellene.

Gje 100.000 kroner til veldedig formål. Kven får pengane?

– Eg vil gi pengane lokalt, til Os Fotball. Arbeidet som blir gjort i idrettslag bidrar til mykje positivt for mange menneske.

Du skal vera éin månad åleine på ei aude øy. Det kjem forsyningar med mat og vatn, kva tre ting tar du med?

– Gitar, penn og papir. Og ein tannpirkar.

Kva er det finaste bygget i Os?

– Solstrand Hotel & Bad.

Kva veg skal dorullen henga, med papiret ut frå veggen eller nærmast veggen?

– Det har eg aldri tenkt over. Den kan stå på golvet for min del.

Inviter tre kjendisar til middag. Kven får koma?

– Jürgen Klopp, Kevin Vågenes og Ariana Grande. Det trur eg hadde blitt ein fin mix. Det hadde i alle fall blitt ein vittig kveld!

Kven ser du opp til?

– Mamma og pappa. Viss eg får like fine verdiar som dei når eg blir eldre, så skal eg vera nøgd.

Kor tid blei du sist sint, og kvifor?

– Det var sikkert på fotballbanen. Eg blir ofte sint mens eg speler kamp, og så hugsar eg ikkje etterpå kvifor eg var sint. Sist gang eg var skikkeleg sint var nok på Torkel Hjertnes.

– Er Torkel den du oftast blir sint på?

– Nei, langt ifrå. Eg sto godt plassert, men så nekta han å sentra til meg. Eller, det kjentest i alle fall sånn ut. Eg blei rasande. Men eg blir fort blid igjen.

Kor tid var du fysisk mest utmatta?

– Eg var ganske utmatta på ei røykdykkarøving eg nyleg var på, men det har vore verre.

– Ein gong eg sprang 3000 meter på ungdomsskulen må ha vore det mest utmattande eg har vore med på. Ein eg hadde gym med var veldig god til å løpa, og eg bestemte meg for å henga meg på han. Eg var heilt knust då det var tre rundar igjen, men klarte å følga han til mål. Etterpå låg eg knust på den raude grusen på løpebanen i sikkert 10-15 minutt.

Om du skulle hatt eit anna yrke, kva skulle det vore?

– No jobbar eg med å bli brannmann, men om det skulle vore noko anna, så kunne eg kanskje blitt hemmeleg agent? Neida, jagerflypliot hadde vore tingen!

Kva musikar eller band ville du helst gått på konsert med?

– Michael Jackson, om han framleis var her. Eller Ed Sheeran. Han har fine tekstar og skal vera veldig god live.

Kva bok las du sist?

– «Mitt liv som I» av Kjetil Rekdal. Men eg hugsar ikkje om eg las den ferdig. Eg les lite bøker, boka om Rekdal og boka om Zlatan er dei einaste eg har lese dei siste åra.

Anbefal ein god film eller serie.

– Eg har sett ein del gode franske filmar, men det er vanskeleg å hugsa tittelen på dei. «Mindhunter» er ein serie som eg synest var spennande. Den handlar om kriminalpsykologi og FBI som intervjuer fleire seriemordarar for å prøva å forstå korleis dei tenkjer.