Rosa golf på Bjørnefjorden

Kvart år arrangerer Noreg Golfforbund, Kreftforeninga og lokale golfklubbar Pink Cup, golfturneringer med formål å setja fokus på og skaffa inntekter til brystkreftsaka.

- Det er femte året vi er med og arrangerer lokal turnering her på Bjørnefjorden, fortel turneringsleiar Mia Helen Hansen Hjelle.

I fjor var klubben ein av dei klubbane i Noreg som samla inn mest pengar og på den måten kvalifiserte seg til landsfinalen. Totalt samla golfarane inn drygt éin million kroner til saka. Årets landsfinale går på Kongsberg GK i midten av september.

- Eg håper jo vi klarar å bli blant dei beste i landet i år òg, seier Hjelle i det ho oppfordrar både golfarar og andre til å ta turen til golfbanen laurdag frå klokka 10.

- Ein treng ikkje spela golf for å vera med på arrangementet og bidra. Ein kan like gjerne koma opp her, sjå på dei som speler og ta seg ein kaffikopp i restauranten.

Ope for alle

Sjølve turneringa er ei såkalla par-turnering kor to og to speler saman og slår annankvar gong.

- Dette er ein utruleg sosial turneringsform kor konkurranseelementet er litt nedtona.

- Sjølvsagt går vi for å vinna når vi entrar banen, men det er ikkje det viktigaste på laurdag. Då handlar det om å samla inn mest mogleg pengar, smilar turneringsleiaren.

Para vil bli sett saman slik at dei blir mest mogleg jamne.

- Her vil det vera med alt frå nybyrjarar til proffar som Solveig Helgesen. Om det er nokon som ikkje har meldt seg på enno er det berre å gje ein lyd. Einaste kravet er at dei har spelt litt golf tidlegare.

- Både kvinner og menn er hjarteleg velkomne, presiserer Hjelle.

Karane bidreg

Brystkreft rammar ikkje berre kvinna som får sjukdomen, men heile familien blir påverka om mor eller dotter blir sjuk.

- Mange kjenner nokon som har blitt ramma.

- Difor kjem også herregruppa og seniorgruppa til å donere pengane frå sine faste turneringar neste veke til aksjonen.

- I tillegg kjem vi under sjølve turneringa på laurdag til å ha nokre lokale reglar som vi håpar kan bidra til å auke summen. Mellom anna kan ein kjøpa eit utslag frå nokre av dei beste spelarane våre undervegs.

- Vi håper vi i løpet av turneringa og dagane etterpå skal klara å bikke 10.000 kroner til brystkreftsaka, avsluttar Mia Helen Hansen Hjelle.