Røyk veltar ut av Fjellheim

Fredag litt før klokka 13 fekk Midtsiden melding om mogleg brann i Fjellheim.

Det tidlegare kulturhuset, som førre månad blei lagt ut for sal, har brent ned til grunnen før. Første Fjellheim, som blei bygd i 1911, brann ned etter 25 år.

Dagens Fjellheim opna for 80 år sidan.

– Nei, det er ikkje brann, seier Stein Gjøsund.

Brannsjefen fortel at det er øving i bygget, og at dei ikkje har sett fyr på noko.

– Vi bruker teaterrøyk. Vi hadde øving for ei veke sidan òg, og då kom det ein kar løpande som trudde det var brann.

Ei øving som handlar om vanskelege val

Det er dagens vaktlag som deltar i øvinga, og den går ut på at to personar er i 2. etasje, mens det brenn i første.

– Dette gir vaktlaget nokre utfordringar. Skal dei velja å gå opp for å redda dei to, eller skal dei prioritera å sløkka i første etasje mens dei ventar på neste lag?

Gjøsund fortel at han sjølv har vore med på sløkkejobbar der nokon valte det første. Det fekk konsekvensar.

– Det var i Bergen for ein del år sidan. Røykdykkarane gjekk opp, men så tente røykgassen og to branntenestemenn hamna på Haukeland med store brannskadar.

Samtidig blir det øvd på å gje førstehjelp parallelt med sløkkearbeid.

– Vi får god øving i Fjellheim, men vi har altså ikkje sett fyr på bygget.