Rusmisbruk i jula

Lesarinnlegg: Jula nærmar seg og folk hastar i veg til butikkane og pyntar til jul i heimen. Mange gler seg, men det gjer ikkje alle. Det gjeld først og fremst barna.

Kjetil Vasby Bruarøytorsdag 16. des. 2010 11:58

Jula er høgtida det vert drukke mest alkohol. Norske folk hamstrar inn drikke som aldri før, dette er det nokon som må lida for.

Over 120.000 norske barn lever med foreldre som er rusmisbrukarar, ifølgje Helsedirektoratet. Det er tiusentals barn som gruar seg til jul kvart einaste år. Hjelpetelefonen frå ulike organisasjonar, som Røde Kors, blir oppringt i fleng frå ungdommar og barn som gruar seg til jula eller er redde for foreldra si drikking.

Ei spørjeundersøking frå 2008 for kampanjeorganisasjonen Av-og-til utført av Synovate viser at over 522.000 nordmenn kjem til å drikke ”mykje eller svært mykje” i løpet av julekvelden. Dette er skremmande opplysningar.

Jula er barna si høgtid. Eg er av den meining at foreldre som drikk seg rusa framfor barna, bør få tilsnakk! Dei er ikkje vaksne nok til å ha barn. Det å ta seg eit glas vin til middagen, er greitt nok, synest eg, men det kan dei vel gjera etter at barna er lagde.

Alle barn har rett til ei kvit jul
Barn er veldig merksame og følgjer med på alle drinkane dei vaksne tar under julefeiringa. Dei får med seg forandringa på humøret og stemninga som byggjer seg opp rund bordet.

I denne samanhengen driv Juvente i saman med Juba og IOGT på med ein kampanje som har til førmål å gjera jula til glede både for barn og foresatte, nemleg Kvit Jul.

Målet er å få foreldre og vaksne (inkludert ungdommar) til å signera ein kontrakt om ikkje å drikka alkohol frå 24. -26. desember, og dette med tanke på barna.

Namnet på kampanjen kjem frå at på same måte som at barn ønskjer seg ei kvit jul i form av snø, ønskjer dei også at foreldra skal vera edru.

Og om du ikkje har barn, oppfordrar eg likevel at du skriv under for solidaritet. I Sverige var det nemleg over 63.000 som skreiv under kontrakten i 2009.

Med denne kampanjen håper eg at fleire tar tak i problemet, og at dei vaksne tenkjer på barna i julehøgtida.

Eg oppmodar til å signera på hvitjul.no, eller ta turen innom Amfi Os tysdag neste veke der nokon vil ta imot underskrifter og fortelja om kampanjen.

Alkoholmisbruk i jula er meir vanleg enn det folk trur. Og er det nokon som fortjenar å ha det bra i jula, så er det nettopp barna. For alle barn har rett til å føle seg trygge. Alle barn har rett til å gled seg til jul. Alle barn har rett til å feire jula saman med sin familie utan bekymringar.

Alle barn har rett til ei kvit jul.

Sondre Haug (17)
Frå Juvente