Så høg var vasstanden søndag kveld

Laurdag var det kraftige vindkast og høge bølgjer.

I Os hamn slo bølgjene over den inste moloen.

Bjørnfjorden brann og redning fekk laurdag kveld melding om mogleg usikra båt og velta tre ved handikapbrygga i Landboden.

– Båten var fortøydd, men treet låg velta og laust, og kunne gjort skade om det hadde hamna på rek ned elva, seier vakthavande Espen Storum frå Bjørnafjorden brann og redning.

Brannvesenet sikra treet. Teknisk eining skal fjerna det i dag.

Søndag kveld fekk brannvesenet melding om diesellukt på Hatvik.

– Vi var ute og sjekka mellom båtane i marinaen, men det var mørkt og vanskeleg å sjå om det var oljeshine på vatnet. Vi har folk der ute igjen i dag for å sjå om det er noko forureining, fortel Storum.

Søndag kom gult farevarsel om høg vasstand. I Os var den venta å bli 175 cm høg søndag kveld.

Måndag er farevarselet utvida til å gjelda frå Svenskegrensa til Ålesund.

Vasstanden er venta å bli 176 cm, altså litt høgare enn søndag kveld. Til samanlikning var rekordfloa i februar 208 cm høg.

Det er flo klokka 11.31 og 23.42 i Os måndag.

Det er venta meir regn denne veka. Storm melder regn kvar dag til og med laurdag, Yr melder opphaldsvêr tysdag, fredag ettermiddag og laurdag.

Vinden har løya og skal halda seg mellom 3 og 5 m/s, med unntak av torsdag, der Storm melder 6 til 8 m/s frå vest.

Sjå vêrmelding for Osøyro frå VG Pent, som viser Yr og Storm side om side.