Samla inn 103.558 kroner
Russen sette ny rekord og nådde målsettinga då dei tok eit krafttak mot kreft onsdag.
Før innsamlinga fortalde aksjonsleiinga at dei hadde som mål å få 1000 kroner i snitt på kvar bøsse.
- Vi enda på nesten 1300 kroner på kvar av dei 80 bøssene som var ute.
- Det er vi veldig nøgde med, smiler Anette Holmefjord frå Os vidaregåande skule til Midtsiden.
Dei ivrige bøsseberarane gjekk lengre i både tid og område enn det dei hadde planlagt.
- Vi blei veldig godt mottatt då vi kom på dørene.
- Det verka som om fleire hadde venta på oss. Til dei vi ikkje rakk innom må vi berre beklaga, men eg håper dei likevel støttar kreftforeninga ved å gje via SMS eller direkte på kontonummer, seier Holmefjord.
Fekk pizza
Holmefjord som var aksjonsleiar ved Os vidaregåande skule fortel at det aldri har vore så mange av tredjeklassingane ved skulen som har vore med på aksjonen tidlegare.
- Det trur eg var ei viktig årsak til at vi klarte ny rekord.
Oppteljinga av dei innsamla pengane gjekk føre seg på gymnaset, der russestyret spanderte pizza på teljekorpset.
- Det var god stemning, som berre steig og steig etterkvart som vi såg kor mykje penger vi hadde samla inn.
- No gler vi oss til å kunne feira russetida med godt samvit, avsluttar Anette Holmefjord med eit smil.