midtsiden

Satsar på Smak

Han har vore alt frå kjøkkensjef til kjøkkenseljar, Hans-Petter Jørgensen. No startar han selskapet Smak Catering i det han kaller eit av fylkets beste produksjonslokaler.

Av: Kjetil Vasby Bruarøy

Hans-Petter Jørgensen tok læretida som kokk på Hotell Norge i slutten av 70-talet, og hans første jobb som kokk var på Solstrand Hotel & Bad. Sidan har han vore kjøkkensjef både på Sjøhuset på Stord og på Hotell Admiral, men han har også erfaring frå den andre sida av bordet.

- Eg har jobba med sal og marknadsføring av varer til storkjøkken, eg har selt kjøkken, og eg har drive som konsulent for restaurantbransjen, der eg har leigd meg ut som rådgjevar til drivarar som har kjempa med å få restauranten sin til å løna seg, fortel Jørgensen.

Han kjem til duk og dekka bord når han no startar selskapet Smak Catering i etasjen over Meny i Industrivegen.

Enorm kapasitet
I det 250 kvadratmeter store produksjonslokalet der Matglede tidlegare heldt til har også Fisketorget vore leigetakar med si cateringavdeling. Med det same Jørgensen i sommar fekk høyra at lokalet sto ledig blei han interessert.

- Lokalet er svært godt utstyrt, og Norgesgruppen har gjeve meg fine vilkår.

Han meiner det knapt er noko lokale i Hordaland som er like godt eigna å driva cateringverksemd i.

- Det tilfredsstiller dei strengaste krav til matvareproduksjon. Her kan vi blant anna senka temperaturen så vi kan produsera i ubroten kjølekjede, og vi kan vakuumpakka om vi vil driva industriell produksjon, for eksempel  til sal i bensinstasjonar.

Kortreist mat
Jørgensen vil ha heile Midthordland som målgruppe og ser på lokalisasjonen sin i Os som ideell.

- Os i seg sjøv er ein stor marknad, frå dåp, bryllaup og feiring av rund dag, til lunsj i bedrifter, møte eller overtidsmat.

Ikkje berre får han kort veg å levera varene, han vil også satsa på råvarer frå produsentar i nabolaget.

- Eg har sans for slow-food, eller kortreist mat som mange kallar varene frå lokale produsentar. Og kvifor skal eg kjøpa spekeskinke i Italia viss eg får like god i Hardanger? spør han.

I starten bruker han frilans-kokkar til assistentar, men på sikt ser han for seg å ha 2-3 fast tilsette i tillegg til seg sjølv.

- No skal eg først ha på plass eit par praktiske ting, og så satsar eg på produksjonsstart i midten av november, seier Hans-Petter Jørgensen.

Fleire saker