Seig generalprøve

Søndag spelte Os siste treningskamp før seriestart. Trenar Tim Henrik Sperrevik blei skuffa då det viste seg at 2. divisjonslaget til Fyllingsdalen hadde spelt mot Austevoll dagen før (kampen enda 0-0), og derfor stilte med andrelaget sitt mot Os.

Sperrevik ville, trass i at kampen var på tampen av ei lang og tung treningshelg, gje Os mykje motstand i dag.

Men Fyllingsdalen 2, som rett nok var forsterka med nokre andredivisjonsspelarar, viste seg å vera plenty motstand i dag.

Os - Fyllingsdalen 2: 0-2 (0-1)

– Vi var ikkje heilt på i dag, og naturlegvis veldig tung i beina, utan at det skal vera nokon unnskylding. Fyllingsdalen stilte med ein ung, kvikk og samkjørt gjeng som var hakket kvassare enn oss i dag, spesielt på overgangane, synes Os-trenaren.

Os skapte ein del sjansar, spesielt i første omgang. Men gjestane hadde også sine farlege angrep som ikkje enda i nota, ein god Anders Kloven mellom Os-stengene hindra at det ikkje blei meir enn to imot.

Lett nok i april?

Fyllingsdalen 2 speler i naboavdelinga til Os i år.

–No har vi tre veker på oss til å sleppa opp etter ein vinter der vi kanskje har kjørt litt for hardt på. Vi kjem nok til å få igjen for slitet utover i den lange sesongen, så blir det spennande å sjå om vi rekk å bli lett i beina til seriestart.

Serien startar med heimekamp mot Bjarg laurdag 14. april. Før det, måndag 9. april, er det første kvalifiseringkamp i NM. Den går borte mot Smørås.

Dagens lag

Os: Anders Kloven, Torkel Hjertnes, Per Søgnen Merai, Stian Lunde, Vegard Engelsen Moberg, Tore Valvik, Fredrik Heggland, Erik Kanestrøm, Preben Borgen, Christer Olsen, Ramo Racic.

Innbytarar med speletid: Mounir, John Ole Johannessen og Mats Lepsøe.

Juniorane til kvartfinale

Egil Thuen, Håkon Kvittingen, Håvard Grøteide og Simen Lassen var lånt vekk til juniorlaget for å spela Varegg Cup i dag.

Juniorane til Os tok seg til kvartfinalen, der dei tapte 0-1 for Nymark etter å ha styrt mesteparten av kampen.

Nymark enda med å vinna cupen etter 1-0 over Bjarg i finalen.