For sein for vaksine

Dei ville ta vaksine for ikkje å smitta sin hjartesjuke veslebror. På veg til legekontoret fekk foreldra beskjed om at alle fire sonane allereie er smitta.

Kjetil Vasby Bruarøylørdag 24. okt. 2009 07:13

Fredag møtte Midtsiden.no Elliot (17 månader), som skulle få vaksine mot svineinfluensa. Den vesle sjarmøren har ein medfødd, komplisert hjartefeil, og sto derfor høgt på prioriteringslista då vaksinane kom til Os.

- For fem veker sidan hadde vi mistanke om at han var smitta, så då blei både Elliot og Janne innlagt til overvaking på Haukeland. Vi har vore veldig redd for at han skal bli sjuk, seier pappa Bjørn Michelsen.

Kom for seint
Klokka 14 fredag skulle familien få vaksine. Men på veg til legekontoret kom svaret på prøvane dei tok onsdag.

Alle brørne, inkludert Elliot, har svineinfluensa.

- Eg fekk sjokk. Samstundes er eg glad, for han har kome seg fint gjennom første del av sjukdomsperioden, og truleg er det verste over, fortel mamma Janne Walden.

Vaksine – ikkje berre for eigen del
Dei siste månadane har diskusjonen om vaksinering mot svineinfluensa, influensa A (H1N1). For familien Michelsen har det aldri vore tvil.

- Elliot er i risikogruppa, og vi i familien ville sjølvsagt vera med på å halda smitta unna heimen, seier Bjørn.

- Mormor var også med, i tillegg har vi oppmoda andre i omgangskrinsen vår om å vaksinera seg. Det handlar ikkje berre om å verna seg sjølv, men å hindra å bli ein som smittar andre, spesielt ikkje dei som er i ei risikogruppe.

Heldige
Eldstemann fekk feber fredag for ei veke sidan, måndag blei dei to mellomste smitta og tysdag denne veka fekk også Elliot feber. Etter ei veke innandørs var det fire kvikke og rastlause gutar som stilte til vaksinering ved Flåten Legekontor.

Dei har hatt så å seia alle symptom på svineinfluensa, og heldt kontakt med lege, men sidan almenntilstanden har vore god har både Elliot og brørne heldt seg heime.

- Vi har vore heldige. Det er det ikkje sikkert at alle andre kjem til å bli. Folk bør vaksinera seg både for seg sjølv og andre sin del, meiner Michelsen.