Seriestart utan toppskårar

Måndag var det seriestart i 2. og 3. divisjon, der både Os og Lysekloster tok full pott.

Også Åsane med osing Vegard Leikvoll Moberg, og Brann 2 med Simen Helland Lassen og Fredrik Heggland, vann i serieopninga.

Seriestart for damer og herrar

Onsdag (kl 20) er det seriestart på heimebane for Os 2 og Lysekloster 2 i 5. divisjon.

Søre Neset/Nore Neset i 6. divisjon startar fredag (kl 19), Søre Neset/Nore Neset 2 startar heime laurdag (kl 15) og damelaget til Os speler sesongens første heimekamp søndag (kl 19).

Men allereie i kveld er avdelingsmotstandar og sambygding Søfteland klar for å ta imot Rosendal (kl 19).

Toppskårar skadd på trening i går

Søfteland har vore utan trenar sidan Kenneth Svenningsen i vinter gjekk tilbake til Søre Neset/Nore Neset, som i år stiller med samanslått lag.

– Vi har trent oss sjølv, men i hovudsak blitt leia av ein skadd medspelar, Raymond Pedersen frå Kvinnherad.

– Vi har trent litt lite, men gjort det bra i treningskampar. Vi har aldri spelt så bra som no, meiner Niklas Linde.

Linde har vore toppskårar for Søfteland dei siste åra, men må stå over kampen i kveld.

– Eg skadde meg på trening i går, fekk ein kakk i hælen og må nok stå over ei veke eller to. Men Rosendal skal få slita på den vesle banen vår og vi har mange andre gode målskårarar enn meg, meiner Linde.

Stor og sterk stall

Søre Neset og Nore Neset har slått saman herrelaga sine, og stiller med lag både i 6. divisjon og 7. divisjon i år.

– Situasjonen var ganske lik då eg frå 2005 var med i trenarapparatet til laga, seier Kenneth Svenningsen.

Han leiar førstelaget saman med Stian Kvåle, og fortel om ein stor og styrka stall.

– Vi mista Emilis Zilinskas til Os og Tore Valvik til Lysekloster, men fekk tilbake Frode Buvik frå Lysekloster og Egil Thuen frå Os. I tillegg har vi tilgang på fleire gode ungdomar frå Nore Neset.

– Egil putta 5 mål og storebror Alexander 3 i ein treningskamp vi vann 11-0. Vi klarte også 2-3 mot eit litt A-prega Os 2.

– Og Buvik blir kapteinen vår. Han er, med si erfaring og sin kunnskap, ein veldig populær mann på laget, seier Svenningsen to dagar før seriestart.