Sesongopning laurdag
Laurdag opnar dei første heisane i Voss Fjellandsby for sesongen. Oversikt: Dette er nytt i Ekedalen, Voss Resort og Voss Fjellheisar vinteren 2012-2013.
Det snør i Os i dag, og det har det også gjort andre plassar på Vestlandet den siste tida. Mykje av snøen som kom i oktober forsvann, men no har det kome nok til at Voss Fjellandsby i Myrkdalen kan annonsera sesongstart i morgon, laurdag 1. desember.
– Vi kjører Kari Traa-trekket og Kråni-trekket frå klokka 9.30, melder Voss Fjellandsby på sine heimesider.
Anlegget blir ope laurdag og søndag, og kvar dag frå neste helg, frå fredag 7. desember.
Voss Resort og Eikedalen ventar framleis litt med å opna. Eikedalen skriv at dei har ambisjon om sesongstart 15. desember, Jan Einar Thorsen frå Voss Resort fortel i dag at snøproduksjonen går for fullt og at også dei reknar med opning 15. desember.
Kva er nytt i anlegga?
Som vanleg blir det gjort oppgraderingar på anlegg og løyper mellom sesongane ved dei ulike skianlegga.
Her er noko av det som er nytt ved anlegga nærmast Os.
EIKEDALEN SKISENTER
Nytt i 2012/2013: Ny park, utvida parkering, nyoppussa varmestove og gratis internett.
– Den nye parken kjem i Setertrekket i eit tidlegare ubrukt skogområde over Tallerkentrekket. Her kjem cirka 10 nye rails, seier Fredrik Tønjum.
– På den den inste parkeringsplassen har vi utvida med 50 nye plassar. Varmestova er pussa opp og no har vi endeleg fått internett som blir gratis for gjestane våre, legg han til.
VOSS RESORT
Nytt i 2012/2013: Ny park, ny bru, ny barneheis, nytt frikjøringsområde, ny snøfangar og utvida snøproduksjonsanlegg.
– Vi bruker en del ressursar på det nye hyttefeltet vårt, men har også funne rom for ein del forbetringar i løypene, seier Jan Einar Thorsen.
Ein del av massene frå hyttefeltet blir blant anna brukt til å gjera løypene betre. I tillegg er det bygd ny skibru i utforløypa og det er hogge fram eit fint område for frikjøring.
– Parken blir flytta tilbake til Slettafjellet, men noko utstyr blir ståande igjen i dagens park, mellom Alfaheisen og Tråsdølen. Store snømender sette i fjor ein stoppar for arbeidet med utviding av barneområdet ved Slettafjellet, men i år er ny heis på plass som tar deg heilt opp til varmestova.
Nye snøfangarar er bygd på toppen for å få lagra snø gjennom vinteren til påfyll der det ofte bles av ein del snø.
VOSS FJELLANDSBY
Nytt i 2012/2013: Det store nye i Voss Fjellandsby denne vinteren er naturlegvis Myrkdalen Hotel, som opna fredag 16. november. Men også i løypene er det litt nytt.
– Vi har utvida barneområdet med ny skogsløype i skogholtet ved dagens barneområde retning Helgatun, fortel Kaia Finne.
I samarbeid med Røde Kors har Voss Fjellandsby også bygd øvingsbane for skredsøk, ein permanent bane med nedgravde kofferter med recco og S/M-sendarar. Brukarane kan velja ulike vanskelighetsgradar og sendarane blir aktivert, i ulikt mønster kvar gong.
– Røde Kors eig utstyret, vi driftar banen. Tilbodet er gratis for skigjestar og folk som bruker eigen sendar/mottakar.