Set opp ORBO-buss
Linda Andersen har reist langt for å oppleva ORBO før. No set ho opp buss til sleppefesten i Bergen sundag.
På jam på Bar2Be torsdag i førre veke fekk osingane høyra låtar frå albumet ORBO & The Longshots slepp førstkomande måndag. I går blei albumet lagt ut for førehandsbestilling på Platekompaniet, fredag kjem ORBO på God Morgen Norge på TV 2 og sundag 28. september er det sleppefest for "Masquerade" i Bergen.
- Eg har vore blodfan sidan eg høyrte dei første gong i 2005, og vi er ein gjeng som har reist både til Tysnes, Bergen, Eidfjord og Skjerjehamn for å oppleva bandet LIVE. Høgdepunktet var årets Spellemannspris, då var vi nedom bordet deira med blomar, fortel Linda Andersen.
- Ole er ein fantastisk låtskrivar, og så har han nokre veldig dyktige musikarar med seg, skryt ho.
Linda, som sjølv er aktiv i kulturlivet i Os, arrangerer saman med revy- og kulturkompis Finn Erik Moberg buss tur-retur Bergen sundag.
- ORBO har mange fans i Os, så vi vil gjera det lettare for dei å få med seg sleppefesten, seier ho.
- Bussen går frå Halhjem klokka 19.20, frå Os 19.30 og heim frå Bergen om lag 23.45.
For å vera med i bussen må du vera påmeldt, Linda kan du nå på 93208212.