Siger i serieopninga

Os ville visa seg fram for dei nær 300 tilskoderane som hadde funne vegen til Kuventræ denne lettskya og fine laurdagen. På ei fin, men etterkvart tung grasmatte tok dei imot Bjarg.

Os gjekk raskt ut med eit høgt press og heldt ballen i laget. Raskt pasningsspel gjorde at Bjarg blei løpande i mellom. I løpet av omgangen var Os frampå med fleire halvgode sjansar, spesielt på corner.

- Vi speler ein god førsteomgang, meiner Ostrenar Tim Henrik Sperrevik.

Sjå Tim Henrik Sperrevik oppsummera heile kampen i videoen nedanfor.

Etter snaut 40 minutt spel fyrer Preben Borgen av frå omlag 20 meter. Bjarg-keeperen må gje retur som Eirik Kanestrøm set kontant i mål.

Os gjekk dermed til pause med 1-0 etter å ha hatt banespelet.

Berre éin gong i løpet av omgangen var Bjarg framme på ein farleg visitt.

Bjarg tok over

Os hamna lengre bak i starten på andreomgangen og mista dermed mykje av presset dei hadde i før pause. Samstundes byrja spelarane å gjera ting vanskeleg for seg sjølv i staden for å la ballen gjera jobben.

Bjarg utlikna på ein lobb etter at keeper Anders Kloven feilbereknar om lag 20 minutt før full tid.

Etter utlikninga kjempa Os seg inn igjen i kampen. Dei siste 5-6 minuttane hadde dei igjen banespelet og då Eirik Kanestrøm kom rundt på kanten og la inn framfor mål var kaptein Stian Lunde på rett plass til rett tid og heada ballen i mål via stanga.

- Stian leverer som alltid, slår Sperrevik fast.

Kapteinen skåra også to mål på måndag, då Os vann 3-2 over Smørås på bortebane i første kvalifiseringskamp til NM.

Os-Bjarg 2-1 (1-0)
Målskårarar Os: Eirik Kanestrøm og Stian Lunde.
Os sitt lag: Anders Kloven, Håvard Grøteide, Tokel Hjertnes, Vegard Engelsen Moberg, Per A. Merai, Stian Lunde, Eirik Kanestrøm, Simen Lassen, Fredrik Heggland, Preben Borgen, Christer Olsen.

Innbytarar: Frode Moberg Øvredal, Håkon Fagerbak Kvittingen, Tor Erik Berge, Børge Borgen, Ramo Racic (inn for Preben Borgen), Martin Eidsvik (inn for Håvard Grøteide), Anders Kinden.

VIDEO: Tim Henrik Sperrevik oppsummerer kampen (1.21, Foto: Andris Hamre)

P.S. Utan unødige gule kort styrka gutane Fair Play-fondet med 500 kroner frå Vitaltour.

Neste gang dei får sjansen til å auka storleiken på fondet er førstkommande onsdag. Då tar Os imot Vedavåg Karmøy i andre kvalifiseringskamp i NM klokka 18 på Kuventræ.