Sikker og usikker

Tim Henrik Sperrevik og Einar Algrøy har vore usikre for 2010-sesongen. Men éin av dei har bestemt seg.

Kjetil Vasby Bruarøytirsdag 29. des. 2009 11:27

2009 enda med dobbelt opprykk, med lag i både 2. og 3. divisjon har Os ein god arena å tilby både etablerte spelarar og nye som vil koma til klubben før 2010-sesongen startar. Det er også klart at trenartrioen Frank Hellevik, Tore Nielsen og Ketil Elvenes held fram neste år.

- 2010 byr på nye utfordringar, og det er tydeleg at både spelarane vi allereie har i stallen, og ein del frå andre klubbar, viser interesse for å spela i gult og svart neste år. Vi har vore oppe i 38 spelarar på treningane no rundt jul, seier oppmann Arne Hitland.

Han er samstundes klar på at Os skal supplerast med nokre få, gode spelarar. Os skal i hovudsak bestå av osingar, spelarar som er resultat av det gode talentutviklingsarbeidet som har vore gjort dei siste åra.

Nokon som legg opp?
Kaptein Stian Lunde signerte toårskontrakt i fjor. Frode Buvik kom tilbake frå Fyllingen i sommar, og har busett seg på Os, og Tore Valvik og Torkel Hjertnes er blant dei mange osingane som ikkje har vist anna enn lojalitet til heimklubben.Vi reknar med å sjå alle desse på Kuventræ neste år.

- Vi har ein del eigne spelarar vi skal i forhandlingar med over nyttår, men reknar med å bli samd om kontrakt som gjev vidare spel for dei Hellevik vil ha med.

Stallen blir tatt ut midt i januar.

- Vi har ikkje fått signal om at nokon vil gje seg, bortsett frå Vegard Borgen, som har sagt at han vil trappa litt ned, seier Hitland.

Tim held fram
Årets toppskårar Tim Henrik Sperrevik er også eldstemann på laget. Han har også vurdert å legga opp nokre år på rad.

- Det var meininga å gje seg etter denne sesongen, men det er ikkje lett å kutta ut fotball. Eg har bestemt meg for å halda fram eit år til, hvis Os har bruk for meg i den tøffe puljadei har hamna i, seier Tim.

- Men dette er definitivt siste sesong med A-lagsspel, legg han til.

Sperrevik har også tatt trenarkurs den siste tida, og har berre teorioppgåva igjen frå å bli C-trenar. Han får også ros av instruktør Roald Stigen, som meiner 33-åringen har mange gode trenareigenskapar.

- Førebels trenar eg sonen min Henrik (7) sitt lag, og eg kjem ikkje til å prøva meg som noko A-lagstrenar dei første 10 åra. Men eg fekk faktisk tilbod frå Øystese om å bli assistenttrenar i 2010, noko eg takka nei til på strak arm.

Algrøy usikker
Midtstoppar Einar Algrøy har vore rekna som ein av dei aller viktigaste spelarane til Os sidan han kom til klubben frå Norheimsund saman med Erlend Grønner og Halvard Enes før 2007-sesongen. Men det er usikkert om sotraværingen held fram.

- Eg har takka nei til tilbod frå Nest-Sotra, der eg kjem frå, og Øystese. Det er berre Os som er aktuell, seier Einar.

- Men eg skal bygga hus på Algrøy (nær Nest-Sotra sin heimebane), og gjera mykje av jobben sjølv, så det kan henda at det ikkje blir tid til å pendla til Os.

Planen er å starta husbygginga til sommaren.

- Det kan henda at byggearbeidet blir utsett litt, at eg kan knipa inn ein sesong til. Eller at eg spelar halve sesongen for Os, seier tømraren.

- Kva får deg til å pendla til Os år etter år, når du er familiefar og har klubbar som er nærmare?

- Det er miljøet i klubben, alle kameratane mine på laget som gjer at det anten blir Os eller ingenting, eventuelt eit lag lengre nede i divisjonane, seier Einar.

- Vil ha Hitland som barnevakt
Keeper Halvar Enes, som heldt buret ekstremt reint førre sesong, har også vore usikker for neste år. Enes har flytta til Os med kone og born, men med kone som jobbar i Nordsjøen er ettermiddagane i periodar travle for småbarnsfaren.

- Vi blei foreldre i år, og i januar neste år går permisjonen hennar ut. Dei to vekene eg er åleine i heimen blir det vanskeleg å få tid til trening og kamp, seier Halvard.

- Men eg har veldig lyst til å halda fram, så om dei vil ha meg med i litt redusert stilling, eller om Arne Hitland vil sitja litt barnevakt, så blir det nok litt fotball på meg neste år òg, seier Halvard.

Både Fyllingen og Fana har vist interesse for Os-keeper Kjetil Hansen, men Hansen har verken takka ja til Fyllingen eller gamleklubben på den andre sida av Fanafjellet.

- Det er bra at Kjetil blir verande. Med han, Anders og Marcus tilgjengelege er det ikkje sikkert det gjer noko om ein gamling som meg må stå over litt trening og kamp, seier 33-åringen Enes.

Os har til no signert avtale med to nye spelarar:
Tom Skråmestø frå Baune og Endre Brenne frå Lillehammer/Strandebarm.