Siktar seg inn på første salve

Ròte fjell og frost skapte utfordringar med sikringsarbeidet rundt dei komande tunellinnslaga ved Svegatjørn.

Første salve og sjølve tunelldrivinga, som skulle starta i månadsskiftet januar-februar, måtte venta litt.

– No er vi i innspurten og driv med sikring, bolting og støyping rundt innslaget, fortel driftsleiar Jarle Søviknes frå Veidekke.

– Ifølgje tunellformannen min er det snart klart for å fyra av dei første små salvane. Den første kjem kanskje i morgon.

50 meter framfor den andre

«Vår jobb er å gjera vegen kortare frå by'n til Os enn frå Os til by'n» sa Bjarte Wiberg då han var leiar for Os Sentrumsforening.

Wiberg kan gle seg over at det er sørgåande løp som blir drive først, utan at det kjem til å ha noko å seia for verken opninga av vegen eller for handelsstanden i Os kommune.

Dei to tunelløpa skal drivast parallelt, men det eine skal ligga 50 meter framfor det andre.

10 meter per dag

Når dei første små salvane er fyrt av og drivinga er godt i gang skal det skytast to salvar per dag.

Kvar salve skal knusa seg 5-6 meter inn i fjellet.

Det skal drivast tunell frå begge sider, altså både frå Svegatjørn og Endelausmarka.

Skogafjellstunnelen er 1,5 km lang.

Midtsiden samleside: E39 Svegatjørn - Rådal

Sjå webkamera frå Svegatjørn

Om E39 Svegatjørn - Rådal

• Vegen frå innslaget på Skogafjellstunnelen ved Svegatjørn til du køyrer ut av Lyshorntunnelen er 11,8 km.
• Strekninga er på totalt 17,7 km og skal gå som firefelts motorveg mellom Os og Fana.
• 14,7 av den 17,7 kilometer lange vegen blir i tunnel.
• Skogafjellstunnelen: 1,5 km
• Lyshorntunnelen: 9,2 km
• Mellom tunellane, Endelausmarka: 1,1 km
• I Endelausmarka kjem rasteplassar, kryss til ny fylkesveg til Lysefjorden (Åsen, Lyseklostervegen fv 163), og fleire store næringsområde, blant anna Lyseparken på rundt 500 mål.
• Prosjektet omfattar også ny fylkesveg frå kryss i Endelausmarka til Åsenvegen og utbetring av eksisterande fylkesveg 163 for cirka 40 millionar kroner.
• Lyshorntunnelen (9,2 km) kjem i nord ut i Rådal, med ei kort dagsone og kryssområde på 200 meter før den går vidare i 2,2 km lange Råtunnelen. Denne kjem i fjellet vest for dagens vegsystem ved Laguneparken. Ny vegline held fram til dagens riksveg 580 sør for Troldhaugtunnelen.
• Pris 6,5 milliardar kroner (2014 prisnivå), 40/60 bompengar/stat
• Byggestart: Torsdag 3. september (1. oktober i Os) 2015.
• Antatt ferdig i 2022