Siljas sommarfavorittar

Silja Døsen Moberg har markert seg med eit stort engasjement for lokalmat både gjennom Bjørnafjorden Matkultur og ikkje minst gjennom firmaet Osøyro Kolonial, som opna utsal no i juni, men når vi utfordrar ho på hennar sommarfavoritter blir ho i stuss.

– Oj, det der var vanskeleg. Det er jo så mykje godt, ler ho godt bak disken på torget.

Lammesalami frå Tysnes

Etter å ha tenkt seg litt om kjem svaret.

– Det må nesten bli det som vi hadde i går kveld. Spekemat og gode oster er heilt nydeleg på seine sommarkveldar. Gjerne med ein kald handverksøl eller ein alkoholfri musserende rabarbrasider frå Hardanger.

– No er nok eg, og eit par av dei som jobbar saman med meg, skikkeleg ostenerd, men det er så godt saman med ein lammesalami frå Tysnes eller ein trøffelsalami, smiler ho.

– Dessuten er det jo utruleg gøy å la folk få oppdage nye smaker når dei kjem innom.

– Tørr å prøve noe nytt

Silja har ei klar oppmoding til osingane i sommarvarmen.

– Tørr å prøve noko nytt. Eg får ofte mykje skryt for salatane eg lagar til kundane. Dei er ikkje så veldig spesielle, men eg puttar litt smak i dei i form av urter, salt, pepper og gode edikkar. Folk må tørre å tenke litt ut av boksen.

– Kva med oss som føretrekk å "berre" slenge eit kjøtstykke på grillen?

– De må òg tørre å prøva noko nytt. Til dømes dette kryddere her, som er produsert på Sotra. Flammehav er eit tarekrydder som består av fingertare, chilli og sesamfrø. Det er fantastisk godt på grilla kjøt, fortel ho entusiastisk.

– Og så kan du nytta Søl, som er eit krydder av raude alger med masse smak, på desserten. Det er heilt himmelsk på is, avsluttar ho med eit stort smil.