– Sist eg spelte i Os var eg 11 år

I 2017 var det Rita Eriksen på plakaten då Oseana Kunst & Kultursenter, i samarbeid med Er-An Veikro og Os Amcar Klubb, inviterte til country & western-kveld.

I år er det Claudia Scott som skal setja den musikalske stemninga.

– Eg hugsar godt Fjellheim

Midtsiden fekk slå av ein lang og god prat med Scott onsdag kveld, og det var tydeleg at ho ser fram til fredagens konsert på Oseana.

– Eg har enno ikkje spelt i Oseana, men eg hugsar godt at eg har spelt i Fjellheim saman med far min i bandet «Clive Scott & The Skywegians». Eg kan ikkje ha vore meir ein 10-11 år den gongen, men eg hugsar det enno.

Litt enkel matematikk fortel at dette då må ha vore rundt 1968-69.

– I den perioden var det kvar fredag ei tosiders annonse i Bergens Tidende stappfulle av dansearrangement. Det var dans på kvart samfunshus, ungdomshus og grendahus i fylket. Sjølv om eg berre var eit born den gongen, var det å spela på dans verdas mest naturlege ting for meg, og noko eg hugsar med glede.

Ver ærleg

Claudia Scott markerer i desse dagar 25 år som soloartist.

– Korleis overlever ein som artist i 2018, og kva råd vil du gje unge artistar i dag, då spesielt jenter?

– Ikkje gje opp, tru på det du held på med, følg magekjensla, og ver ærleg kjem det engasjert frå Scott.

– Eg er no i ein posisjon kor eg kan velja kva eg skal gjera. Eg må ikkje gjera noko, men samstundes har jo bransjen snudd totalt på den tida eg har vore artist. Der ein tidlegare spelte inn ei plate for å selja plater, speler ein no inn ei plate for å kunna turnera og selja billettar.

– Så i tilegg til å vera dørgande ærleg med kva ein gjer, må ein vera innstilt på å forandra og tilpassa seg undervegs understrekar Scott.

– Eg opplever samstundes at det er meir likestilling mellom gutar og jenter i musikkbransjen no. Nivået er skyhøgt, den tekniske kompetansen er imponerande. Eg meiner heilt klart at framveksten av musikkskular og mykje musikk i barneåra har hatt mykje å seia her.

Travel 25-åring

Claudia Scott driv i desse dagar og jobbar med oppfølgjaren til «Let The Ribbons Fly» som kom ut i 2016. I tillegg produserer ho debutplata til vinnar av «Norske Talenter 2015», Odin Landbakk. Denne plata er forventa ute i 2019.

– Du kviler ikkje på lauvbæra, og var i tillegg å sjå på «Hver gang vi møtes» i vår. Korleis var det konseptet?

– Eg må innrømma at det var både utfordrande og skremmande. Eg kjente eigentleg berre meddeltakar Tor Endresen frå før, og i mi karriere som soloartist har eg berre spelt inn i éin coverlåt før.

– Det er 10 lange dagar med innspeling frå tidleg om morgonen til seint på natta. Ein må heile tida skifta fokus og levera, men det er samstundes eit utruleg profesjonelt apparat i sving rundt oss.

– For meg handla dette igjen om å vera ærleg. Eg ønskte at sjåarane skulle få oppleva kven eg er, kven Claudia Scott er, men gjennom mine tolkningar av dei andre sine låtar.

Organisk oppleving på Os

Til konserten på fredag kjem Claudia Scott med eit solid band i ryggen.

– Til dei som skal på konserten på fredag, kva kan dei forventa seg frå deg og bandet? Vert det ein rein «The Best Of Claudia Scott»-konsert?

– Nei, det vert mykje materiale frå dei to siste platene, men sjølvsagt vert det tid for tilbakeblikk òg seier Scott.

– Eg kan i alle høve lova ei organisk musikkoppleving full i energi.

Til konserten i amcar, om du vil

Marknads- og kommunikasjonsansvarleg ved Oseana, Veronica S. Halhjem gler seg stort til fredagens country- og westernarrangement.

– Eitt år til no, så har vi ein tradisjon. Eg veit i alle høve at mor mi skal på konsert. Ho hugsar jo Claudia frå Fjellheim!

– Det er utruleg kjekt at vi har fått til dette samarbeidet med Er-An og amcarklubben, kor du kan tinga deg standsmessig transport frå kommunegrensa og rett til døra her på Mobergsneset.