Siste irske innspurt

Førre veke kom skjenkeløyve på plass, fredag 17. desember blir det opningsfest på den nye nattklubben i Os.

- Eg trur eigarane har valt rett når dei ikkje har prøvd å laga ein superhip plass, sånne uteplassar må fornyast annakvart år, seier dagleg leiar Ole Christian Garmanni.

- Irish Cat ser ut til å bli ein smakfull innreia nattklubb som kan appellera til vaksne og bli ein plass som kan stå seg i mange år.

Ser etter plass å bu
Garmanni har vore barsjef på Champions og Sin (som Risti eig frå før) dei siste fem åra. No skal han flytta frå Bergen til Os for å styra Irish Cat.

- Den siste tida har eg vore på husjakt, ved sida av at eg har jobba med å førebu opninga.

- Legg til at han er singel, ler Risti.

Dei to første
Eit vaktselskap har fått oppdraget med å passa døra. Før helga fekk Garmanni sine to første kollegaer; Marita Bruarøy og Remy Søfteland.

Marita bur på Hatvik og jobbar i butikk på dagtid. Remy, som har litt fartstid på Solstrand, er no klar for å servera i sentrum når han ikkje er opptatt med å førebu Søfteland på ny divisjon og nok eit opprykk.

- No gler eg meg til opning, og til å servera mojito og strawberry daquiri til osingane. Eg har servert strilar før, dei er dei kjekkaste kundane som finnest, synes Garmanni.

God mingle-plass
Eigarane av uteplassen, Espen Risti og Bergen Servering, har lang fartstid i utelivsbransjen i Bergen, og har fått ein rutinert arkitekt til å teikna innsida av Fagerthun-huset pånytt.

- Lokalet er heilt genialt, rominndelinga var det som gjorde at vi bestemte oss for å gå for dette. Blindgater er ikkje bra for ein uteplass, måten gjestane kan bevega seg på betyr mykje, seier Risti.

- No kjem dei direkte inn til kortsida på baren, som får tett og lun atmosfære. Tidleg på kvelden skal området rundt baren bli ein koseleg plass å sitja.

Vidare kan turen gå til ein bås eller til eit bord ute ved vindauga, til høgare sitjegrupper i biljard- og dart-avdelinga eller inn på platået rundt scenen i LIVE-avdelinga.

- På Irish Cat skal det bli naturleg å mingla, å gå frå bar eller LIVE-avdeling til bås eller biljardbord, utan å måtta gjera heilomvending.