Siste sving før Stord-kampen

– Eg treng ikkje bli med på bilde nei, seier Torkel Hjertnes.

– 2. plass er jo den verste plasseringa du kan få, la han til, etter at Mats Lepsøe på tampen av golfdagen slo eit litt lengre slag enn Hjertnes.

Lagkameratane avslutta golfdagen på simulator, på den eine skulle du berre slå langt, på den andre skulle få utslag nærmast mogleg holet.

Hjertnes hadde tydelegvis talent, men måtte nøya seg med 2. plass på begge, for Håvard Grøteide kom nærmast holet.

– Ei stund sidan sist

Kaptein Stian Lunde, som for nokre år sidan jobba fem somrar på rad på Bjørnefjorden Golfklubb, hadde favorittstempel før den sosiale aktiviteten med fotballkameratane.

– Det var sommarjobb og eg jobba mykje meir enn eg spelte, seier Lunde, som ikkje heilt levde opp til forventningane.

– Dessutan er det lenge sidan. Det er også ei stund sidan sist vi gjorde noko liknande i lag. Sist gong var det vel songkonkurranse på treningsleiren, som var sjukt vittig, fortel kapteinen.

Borte mot serieleiaren

Både Lysekloster og Os spelere på bortebane denne helga, Lysekloster mot Øystese klokka 14 i dag, Os mot Stord klokka 18 søndag.

–Vi var ikkje nøgd med poengdeling i førre heimekamp og får ein tøff bortekamp mot serieleiar søndag, så kan det vera greit å lausna opp litt, ha det gøy saman og tenkja på noko anna, seier hovudtrenar Tore Nielsen om turen til golfbanen.

Og det var ikkje berre blant spelarane at konkurranseinstinktet vakna for fullt, det blei tett med sarkasme slengt mellom Tore og assistenttrenar Bjørn Mjelva.

Mjelva stilte med rutete shorts, men imponerte ikkje på golfsimulatoren.

– Du skulle sett meg ute på banen, det er putting eg er best på, påsto Coach Mjelva.