– Sit med ein god følelse

Lensmannskontoret har hatt ein gjennomgang av eigen, og arrangørane sin, innsats under Osfest fredag og laurdag.

– Oppsummert så sit vi att med eit godt inntrykk og gode erfaringar, seier lensmann Oddbjørn Dyrdal.

Godt førebudd

I forkant av festivalen hadde lensmannskontoret førebudd seg gjennom fleire møter og godt samarbeid med arrangørane, utestadene og kommunen.

– Eg opplever at vi var godt førebudd.

– Vi veit av erfaring at det blir mykje folk spreidd også utanfor festivalområdet på slike arrangement.

– Vi veit òg at det blir mykje rus og rus, noko som kan vera utfordrande for oss i forhold til å oppretthalde ro og orden.

– Nokre valdssaker har vi registrert, men færre enn det vi kanskje hadde venta.

– No er éi valdssak éi for mykje, så vi vil nok sjå yttarlegare på sikkerhet og vakthald i høve kommande festivalar.

– Publikum må gjera seg fortent til ny festival neste år, og det opplever eg at dei har, fortel lensmannen.

Styrka beredskap

Kvar av dagane hadde lensmannskontoret fire personar på festivalområdet, som ein del av avtalen med arrangørane.

– Dette er det pålagte politivakthaldet til arrangørane.

– I tillegg styrka vi opp beredskapen med UP på vegane, sjøtenesta i fjorden og innsatsleiing i beredskap.

– Det skjer gjerne ting i omkringliggande område til ein festival, dette må vi handtera og difor styrka vi beredskapen.

Ros frå UP

Sjølv om UP gav ni gebyr under kontrollen laurdag ettermiddag/kveld kjem dei med ros til osingane.

– Vi har ikkje registrert noko køyring i rusa tilstand.

– Tilbakemeldingane frå UP er at det var fin køyring og generelt gode tilbakemeldingar.

– No vil vi ta ei evaluering med arrangørane og andre samarbeidspartnarar for å sjå kva justeringar som skal gjerast før neste år.

– Årets festival har iallefall ikkje gjeve oss grunn til å avslå ein søknad for neste år, avsluttar lensmann Oddbjørn Dyrdal.