Sjekk den Nore Neset-fabrikken!

Bildeserie:

1 av 17

I kveld er det premiere på årets musikal ved Nore Neset ungdomsskule. Valfaggruppa «sal og scene» presenterer «School of rock».

To andre valfaggrupper har òg hatt travle veker før premieren; «produksjon av varer og tenester» og «design og redesign».

– Vi valte dette fordi vi liker praktisk arbeid. Her får vi læra å bruka mange ulike verktøy og maskiner, i tillegg er det ekstra kjekt å laga noko som skal brukast av andre elevar, seier Rijan og Frank før dei freser ut eit vuggebein til ein av premiane til loddsalet under musikalen.

– Ein god verkstad med flinke elevar

Ved første augekast kan «produksjon av varer og tenester» sjå ut som ein sløydtime, men her er produksjonen meir samansett.

– Her er det ikkje kvar enkeltelev som skal produsera kvar sin ting som dei får karakter på, men heile gruppa som saman skal levera ei teneste eller vare, fortel Erik Karlsen.

Han leiar dei 27 elevane saman med Espen Halhjem.

– Elevane er med på budsjettering, planlegging og gjennomføring, og er plasserte i grupper og oppgåver etter eigne ønskjer og interesser. Skulen har innreia ein god verkstad og elevane er flinke og engasjerte.

Morosam musikalsk miss

Elles i året har dei blant anna vedlikehald av utandørs treningspark og produksjon av benkar og anna utstyr til skulen og skuleplassen. Til musikalen har dei laga både arbeidsplattform til lyd- og lys, scenemodular, gitarar og premiar til loddtrekninga alle dei fire musikalkveldane.

Før Midtsiden tar bilde av gitarane blir vi åtvara; dei er ikkje heilt etter boka, i alle fall ikkje etter noteboka. Karlsen er ein handyman, men har noko kortare fartstid innan musikk.

– Eg var i utgangspunktet nøgd med gitarane, men så kom Terje Neset (musikklærar) og spurde kva type gitar det var eg hadde fått produsert. Neset hadde ikkje sett gitarar med fem strengar før, seier Erik og ler.

– Heldigvis er ikkje musikalen avhengig av musikk frå desse «instrumenta».

Overdriven design

Også innan design og redesign er det 25-30 elevar. Dei har laga kostyme og dekorasjon til musikalen.

– «School of rock» er 60- og 70-talet, og hippietida er gøy å laga kostyme til, synest lærar Grethe Myklestad.

Elevane har laga slengbukser, tskjorter i batikk og fletteband som kan brukast rundt både hovud, hals og handledd.

– Til scene gjeld litt andre reglar enn design av ordinære antrekk, her skal alt vera godt synleg for publikum, og fleire element, ikkje minst smykke, blir overdrivne i storleik og fargebruk.

«School of rock» blir spelt klokka 19 i kveld og dei neste tre dagane. Saman med musikalen er det kafé og kunstutstilling med mykje fint elevarbeid.