Sjølv plantene er med

Bildeserie:

1 av 8

Tysdag ettermiddag signerte ordførar Terje Søviknes (FrP) og dagleg leiar i Consto Bergen AS, Arve Sande, kontrakten med ein nettoverdi på 170 millionar kroner for bygginga av den nye delen på Luranetunet.

– Det er halvanna år med hardt arbeid som no har komt til ein ende. Byggjestart blir primo november, med ferdigstillelse sommaren 2017, fortalde prosjektsjef Tor Inge Døsen før signeringa tok til.

Store fikenblad

På eit litt fleipande spørsmål frå lokalpressa om kva planter som kom i tropehagen klarte ikkje Døsen dy seg.

– Det blir vel eit par fikenplanter med store blad, lo han før han meir alvorleg la til at også kva planter som skal inn er spesifisert i kontrakten.

Ein litt meir alvorleg ordførar la til at ein nok meir snakka om palmer og sitrontrær.

Drift og bygging - ei utfordring

Søviknes påpeikte at ein no går over i ei ny fase, når ein tek til med sjølve bygginga.

– Det medfører naturleg nok ei endring i kvardagen for dei som jobbar og bur der oppe. Men det skal vi freiste å få til på ein så smidig måte som råd er. Vi har klart å byggja skuler, samstundes med at elevane har gått der, så eg har tru på at vi skal klare å få det til for dei eldre på Lurane òg.

Nettopp det å skulle byggja samstundes med at drifta skal opprettholdast så òg Arve Sande frå Consto Bergen AS som den største utfordringa.

– Det er utan tvil det som blir den største utfordringa for oss som entreprenør, å skulle bygga i eit og ved eit eksisterande bygg med pasienter i. Dialog med dei som jobbar og bur er vil bli særs viktig, meinte Sande, som fekk "trøyst" frå helse- og omsorgsjef Nils-Petter Borge.

– Kollegaene på Luranetunet er av det fleksible slaget og klarte å handtere påbygget for to år sidan på ein god måte. Med god dialog er eg trygg på at vi skal klare det denne gongen òg, forsikra Borge.

– Eit viktig prosjekt for oss

Sande, som saman med kollega og prosjektleiar for utbygginga, Rune Vonheim, starta Consto Bergen AS for tre år sidan la ikkje skul på at det var ei viktig kontrakt for dei.

– Vi er ein fersk organisasjon, men har kompetente folk. Vi er nett i ferd med å ferdigstilla Horisont kjøpesenter med 170 leilegheiter på toppen ute i Åsane, så det å få denne kontrakta inn i ordrereserven er viktig for oss.

– Byggjemarknaden er tøff om dagen og det å få nye store oppdrag tel mykje i høve det å få alle dei vi har hatt i sving i Åsane ut i nye oppdrag, forklarte Sande og Vonheim.

Prognosane avslørar behovet

Rådmann Knut Terje Rekve fortalde at behovet for utvidinga så absolutt er tilstades.

– Prognosane for befolkningsveksta syner at det kjem til å bli fleire i gruppa 80+ enn i gruppe 0-5 år i tida som kjem. I tillegg er det diverre slik at stadig fleire blir demente, difor er dette eit viktig prosjekt med tropehagen kor dei kan vera trygge ute, samstudes som dei er inne.

Sjølv om ein no utvidar på Luranetunet, så ligg kommunen sin strategi om å la flest mogleg bu lengst mogleg heime fast, presiserte Borge.

– Men som rådmannen peiker på, tyder tala på at vi vil ha behov for båe deler.

Totalpris: 270 millionar kroner

Kontrakta blei signert med atterhald om godkjenning frå kommunestyret 29. september.

– Dei vil få seg forelagt ei total bruttoramme på omlag 270 millionar, men då er det inkludert lausøre som møblar og tilsvarande, finanskostnader, tomtekostnader og ein liten margin, forklarte Døsen.