Sjølvkøyrande el-båt til Lysøen

I september 2016 kom kulturminister Linda Helleland med 15 millionar til ny båt til Museet Lysøen. Fredag denne veka går fristen ut for prekvalifisering for bygging av den nye båten.

– Dette er det morsomste eg har jobba med, seier Atle Ellefsen, senior sjefsingeniør i DNV GL til Sysla.no.

I to år har han jobba med å designa den nye ferja som skal frakte passasjerane til og frå Lysøen.

Sjølvkøyrande miljøfyrtårn

Då Midtsiden snakka med Sigurd Sandmo i kode i samband med pengegåven frå regjeringa fortalde han at båten ville bli eit miljøfyrtårn.

Båten blir ein elektrisk katamaran med vanleg motor som back-up. Båten er i tillegg rigga slik at den kan vera heilt sjølvkøyrande (autonom drift, journ.mrk).

– Det skal bli eit miljøvennleg fartøy som har ein god innovasjonshøgde, seier Sandmo til Sysla.no.

– Her er det sesongbasert fritidstrafikk, og moglegheit til å testa ulike ting, til dømes dette med autonom drift.

I følgje Sysla.no skal båten til å byrja med legges til og frå kai manuelt, medan overfarten skjer med autopilot. Etterkvart er planen at alt skal skje autonomt, men først må nye kaier på plass.

Sandmo håper å kunne inngå byggjekontrakt innan utgangen av året.