Skadd for livet

Onsdag blei ein osing dømt til tre års fengsel og ei prøvetid på tre år. 6 månadar er gjort betinga.

Tiltalte må også betala 100.000 kroner i oppreising til offeret, ein 36 år gamal mann, bestemte Nordhordland tingrett i dag.

Krangla på fest
Laurdag 15. november 2008 var tiltalte på fest med kona. Kona ringte ein kamerat for å bli henta ut på natta, og då kameraten dukka opp i festlokalet oppsto det ein krangel, både mellom ektefellene og med kameraten som med sin sjåfør kom for å henta venninna.

Ektemannen gjekk frå festen, seinare kjørte også kona, med kameraten og hans sjåfør, for å leita etter mannen. Dei fann han på Esso-stasjonen.

Vitne greip inn
Først blei det ein krangel mellom kona og mannen. Kona blei skubba og skalla ned så ho fekk blått auge, så gjekk han til åtak på kameraten.

Kvinna sin bror var vitne til hendinga, og seier tiltalte nærmast kom flygande gjennom lufta og råka kameraten til kona med slag eller spark. Offeret gjekk i bakken og tiltalte sette seg på han, tok hovudet mellom nevane og dunka det i bakken 6 til 8 gongar.

Vitnet greip inn og slo tiltalte på kjeven for å få han til å slutta mishandlinga. Retten meiner det er fare for at tiltalte kunne blitt drapsmann om ikkje vitnet hadde gripe inn.

Overnatta hos kamerat
Etter ein krangel med vitnet forsvann tiltalte. Offeret låg igjen i ein blodpøl, og blei henta med ambulanse.

Tiltalte overnatta hos ein kamerat og blei pågripe morgonen etter. Klokka 11.15 sundag hadde han ein promille på 1,13. Mannen sat i varetekt i to veker.

Tiltalte erkjente straffeskuld, og seier at han fekk "blackout". Han innrømmer også å ha problem med å styra sinnet sitt, særleg når han drikk brennevin. I går blei han dømt for:

"overtredelse av straffeloven § 229 tredje straffalternativ jf § 232: for under særdeles skjerpende omstendigheter å ha skadet en annen på legeme eller helbred eller hensatt noen i avmakt, bevisstløshet eller lignende tilstand, og legemsbeskadigelsen hadde betydelig skade på legeme eller helbred til følge."

Varig skade
Det var opprinneleg tatt ut tiltale i andre straffealternativ for post 1, men etter ein spesialisterklæring 20. august blei det tatt ut ny tiltale med tredje straffealternativ.

Spesialisten som forklarte seg i retten er dr. Eirik Vikane frå "Avdeling for Fysikalsk Medisin og Rehabilitering".

Han fortel at offeret er påført ein alvorleg hovudskade av varig karakter. Pasienten har fått nedsatt funksjon i høgre fot og høgre hand, og har vore sjukmeldt frå episoden skjedde til april i år. Han er no på aktiv sjukmelding.

Vikane uttalte at nokre av funksjonane kan trenast opp igjen, og at venstre side av kroppen kan overta noko av det tapte på høgre side. Han meiner det er for tidleg å seia noko om restarbeidsevne og varige mèn.

Dømt tidlegare
Tiltalte blei også dømt for "brot på straffeloven § 228 første ledd jf § 232: for under særdeles skjerpende omstendigheter å ha øvet vold mot en annens person eller på annen måte fornærmet ham på legeme."

Han har også tidlegare blitt dømt for vald mot kona. I 2008 blei han dømt for å ha tatt kvelertak på ho og for å ha skalla ho ned. Den gong fekk han ei bot på 10.000 kroner. I same tiltale blei han dømt for slåssing med same offer som fekk svi novembernatta.

Mannen blei også dømt for vald i 2002, då han skalla ned ein ungdom på ein nyttårsfest. Då fekk han ei straff på 60 månadar betinga fengsel.

I 2005 blei han dømt for å ha slått ned ein annan ungdom. Straffa var 60 dagar fengsel, 30 av dei betinga.

Straffeutmåling
Retten meiner at det er utøvd ekstremt rå og brutal og ute av alle proporsjonar, sjølv om han kanskje var ”sur” på fornærma.

Verken det at han angrar, har erkjent forholdet og ikkje drikk alkohol har verka inn på strafeutmålinga.

Årsaka til at 6 månadar er gjort på vilkår er at tiltalte er gift og har forsørgjaransvar.

Artikkelen er sperra for kommentarar.