– Skal dei ikkje ta dette ned før snøen kjem?

Eit tre har velta og ligg over ein kabel som går langs rv 579 Hegglandsdalsvegen i Rødsliane.

– Treet har lagt sånn i eit par månadar, fortel Agnar Midtsæter.

Han køyrer forbi kvar gong han skal til og frå Osøyro og heimen sin på Bogstrand, og undrast over at ingen har rydda treet vekk.

– Dei bør i det minste få det vekk før snøen kjem. Kjem det vekt på treet kan det både ta med seg kabelen og hamna ut i bilvegen.

– Vil varsla entreprenøren

Vegtrafikksentralen kan ikkje på strak arm svara på om dei kjenner til treet, eller kvifor det ikkje er fjerna til no.

– Om det er straumførande kabel ville nok entreprenøren ha varsla BKK, om det er ein telekabel er det Telenor eller Telia si oppgåve.

– Men eg vil uansett varsla entreprenøren vår, så vedkomande får sjekka forholda og varsla rett eining, seier vakthavande i Statens vegvesen.