Skal dela ut 11.000

Frode Sirevåg er på jakt etter kandidatar til «Frivilligprisen».

Kjetil Vasby Bruarøyonsdag 21. apr. 2010 07:43

Frode Sirevåg og Vidar Bratlund Mæland kjenner at det kriblar.

- Vi la opp med dansebandet Frode Vidars berre for å gjera comeback. Samstundes er det ei stund sidan vi sto i spissen for filmfestivalen, så no kjente vi at det var på tide å arrangera noko, seier Frode.

- Til no har vi berre hatt oss sjølv å by på, no lagar vi festival for både ungar og vaksne, samstundes som vi har oppretta ein ny pris.

Treng fire nominerte
Frivilligprisen, eller stipendet, som Frode kallar det, skal gå til ein person eller ei gruppe frivillige som gjer ein viktig innsats for andre.

- Det kan vera eit lag eller ein organisasjon, eller nokon som står veldig på for eit lokalt lag i Os. Eller for andre.

- Det er veldig mange som gjev mykje av seg sjølv og tida si. Desse kan no få både merksemd og pris. Alle dei fire nominerte får kunst, vinnaren får eit stipend på 11.000 kroner.

- Legg de nokre føringar for kva stipendet skal gå til?

- Nei, men vi reknar med at dei blir brukt til å hjelpa vedkomande i sitt vidare arbeid.

Kandidatforslag med begrunnelse kan sendast til post@frodevidars.se

Frode Vidars Festivalen
Sjølve musikkfestivalen skal, som filmfestivalen, vera gratis. Fredag 18. juni blir det karneval for barnehagane i Os på Kyrkjeflaten, laurdag blir det familiefestival på Peppes og området utanfor.

Både fredag og laurdag har dei planar om rike musikkopplevingar på kveldstid, med ei rekkje ulike band.

- Vi har hatt fleire vellukka konsertkveldar med Frode Vidars med venar her på Peppes, på festivalen blir det rundt 10 band. Frode Vidars skal også på scenen, men er først og fremst ei ramme på arrangementet.