Skal kontrollera støyen frå ny E39

Fleire osingar får nøkkelroller i Statens vegvesen når E39 Svegatjørn - Rådal skal byggast.

Ein av dei, Henrik Nordahl-Pedersen, hadde første dag i ny jobb i går.

Nordahl-Pedersen, som fyller 35 år i år, er nytilsett kontrollingeniør for støyisolering av private bustadar i samband med den nye vegen.

130 hus i Os og Bergen

Byggeleiar for lokale støytiltak, Per Kristian Sønsthagen, fortel at prosjektet allereie er i gang.

– Med ny veg må vi følgja dagens krav, også når det gjeld eksisterande bustadar. Vi er i gang med fleire hus som får nye vindauge, ny isolasjon og kledning eller ny støyskjerming på tomta, seier Sønsthagen.

– Til saman er det 130 bustadar i Os og Bergen som får ulike tiltak med støyskjerming. Dei fleste er i Bergen, 10-20 av dei er i Os.

– Passar svært godt til jobben

Sønsthagen er Nordahl-Pedersen sin nye sjef. Han var med på å tilsettinga av osingen.

– Vi søkte etter ein ingeniør med praktisk tømrarerfaring.

– Vi hadde mange gode søkjarar, men sjølv om Nordahl-Pedersen kom rett frå studiet skilte han seg ut som den beste kandidaten.

Valte skule etter 11 år som tømrar

Henrik fortel at han ikkje var sikker på vidare studieretning etter at han var ferdig med gymnaset. Etter eit år som hjelpearbeidar hos ein byggmeister, og eit år på folkehøgskule, fekk han jobb som ufaglært tømrar ved eit anna byggmeisterfirma.

– Eg tok teorien på kveldstid og svennebrev som privatist. I 2005 fekk eg fagbrev, seier Henrik.

Så, i 2012, fann han ut at han ville vidare i faget.

– Eg var klar for å læra noko nytt og har alltid hatt sans for konstruksjon, fortel den nyutdanna ingeniøren.

Han leigde vekk einebustaden sin i Øyane og reiste til Høgskolen i Gjøvik for å studera konstruksjonsteknikk.

– Forkurset eg trengte for å søkja på ingeniørstudiet, med matte og fysikk, var det vanskelegaste. Eg merka at det var ei stund sidan eg hadde vore på skule.

– Men det var samtidig god førebuing, då eg kom i gang med ingeniørstudiet var eg både klar og motivert. Det gjekk i grunnen overraskande bra, seier Nordahl-Pedersen, nøgd med å gå rett frå fullført høgskule til ny og spennande jobb for Statens vegvesen.

Midtsiden samleside: E39 Svegatjørn - Rådal