Os kammerkor skal synga i denne 700 år gamle katedralen i Barcelona sin naboby. (Foto: Kjetil Vasby Bruarøy/Os Travel)

Skal synga i spansk katedral

Os kammerkor testar repertoaret i Oseana, saman med Os Mannskor, før avreise til Tarragona.

image
image
image
image
image
image
Av: Kjetil Vasby Bruarøy

Sist dei var på tur saman var for to år sidan, då gjekk turen til songarstemne i Eidfjord. Neste helg går turen til Tarragona, ein time sør for den meir kjente spanske byen Barcelona.

– Vi har vore på langtur saman før, blant anna til Orknøyane, Praha, Bremen og York, men dei er nokre år sidan vi var utanlands saman, og vi gler oss veldig, seier styret i det 43 år gamle blandakoret.

I Spania skal dei både synga i The Cathedral of Tarragona, innvigd i 1331, og på ein av Spanias ti beste vingårdar innan økologisk vin, Mas Blanch i Jove.

I forhandlingar med biskopen

Bakgrunnen for val av destinasjon er at kormedlem Georg Jørgensen har vore på tur med lokale Os Travel til byen.

• Les òg: Mat og vinreiser til Barcelona sin «hemmelege» naboby (2017)

Georg likte seg og sette reisenestor Hans Parnefält på nye oppgåver. Etter dialog med vingarden og forhandlingar med erkebiskopen i området blei to konsertar booka.

– Vi har stort sett sunge når vi har vore på turane våre, men det blir spesielt å ha konsert både i katedralen og på vingarden.

Konserten i katedralen går til inntekt for ei lokal cerebral parese-forening, mens vingarden dei skal synga på òg har ei rik kunstutstilling.

– Flere osingar har smakt vin frå denne garden, den har nemleg blitt servert på Det store Bjørnafjordmåltidet, fortel Hans.

Grieg, Lyssand og Prøysen (på spansk)

I Tarragona er det både sendt ut pressemelding på spansk og avtalt intervju i radio med det norske koret som besøker byen.

32 songarar frå Os kammerkor er med på turen. Onsdag var siste øving, tysdag skal dei synga gjennom mykje av repertoaret når dei, saman med Os Mannskor, har konsert i foajeen i Oseana.

– Vi skal blant anna synga låtar av Grieg, Prøysen og vår eigen Henrik Lyssand. Ein låt av Prøysen er frå før omsett til spansk, så vi har øvd inn «Blaaklokkevikua».

Også den spanske låten skal framførast i Oseana tysdag.

Fleire saker