Skåra alle sjølv
Gothia Cup: Ny siger til Os-juniorane, då dei slapp inn det første målet i turneringa. – Det var ei uheldig klarering frå keeper, så du kan seie vi skåra alle sjølv, fortel Tore Kleppe.
Tysdag ettermiddag møtte Os-juniorane San Pedro Tegus frå Honduras i tredje kamp i turneringa.
– Det blei ein artig kamp mot Sør-Amerikanerane.
1-0 og 2-0 til Os kom med Aksel Skaar og Emil Halver i løpet av første omgangen.
– Då hadde vi grei kontroll på kampen og hadde roen også på sidelinja, fortel Tore Kleppe.
Sørga sjølv for reduseringa
Reduseringa til 2-1 kom då Os-keeperen skulle klarera ein ball.
– Både ein honduriansk angripar og vår forsvarsspelar kom løpande mot keeper.
– Ballen traff først Aksel, så angriparen før den spratt i mål, forklarar sjefssupportar og lagleiar Kleppe.
Etter reduseringa blei Os litt meir stressa, men rodde likevel sigeren greitt i land.
– Like tidleg for svenskane
Onsdag morgon klokka 08:00 går puljefinalen mot svenske Gais.
– Det er tidleg, men like tidleg for svenskane, smiler Kleppe.
– No er gutane og kosar seg i bassenget, før vi skal gå ut og eta felles middag.
– Tek vi siger i morgon også går vi direkte til 32-delsfinalen i staden for vegen om 64-delsfinalen, avsluttar Tore Kleppe.
Os er allereie klare for A-sluttspelet etter tre strake sigre.