Skåra meir enn i fjor

Bildeserie:

1 av 4

Damelaget til Os mista åtte spelarar før sesongstart, Thiet Dang (19) er eldste spelar etter Line Hjelle Berentsen (25).

«Nye» Os har likevel klart seg bra, trass tap i sesongens to første serierundar.

– Vi har eit ungt lag og vi speler i ei tøff pulje. Men jentene er flinke til å halda fokus på vårt spel, og på det vi øver på, synest Gitte Torp.

Ho trener damelaget saman med Trond Budal.

Vanskelege Åsane og gode Oppsal 2

Serien starta søndag 16. september borte mot Åsane. Os tapte 33-22.

– Åsane har ein heilt spesiell, og i internasjonal samanheng, moderne måte å sela forsvar på. Dei ligg ikkje flatt med alle bak, eller éin ute og jagar, men ligg 3-2-1, og er veldig vanskelege å spela mot, synest Gitte.

Målskårarar, Os: Line Hjelle Berentsen 5, Nora Berge 2, Regine Sten 2, Ayleen Hagen 2, Mia Torp Nielsen 2, Julianne Sten, Emma Lyssand og Lene Cathrine Olsen Sande.

Søndag 23. september var første heimekamp. Då var det i praksis topp mot botn frå sånn tabellen såg ut i vår, serievinnar Oppsal 2 mot Os, som var nær nedrykk.

Kampen enda 22-36. Eit stort tap, men Os skåra 4 fleire mål enn i begge kampane førre sesong (18-29 og 25-18).

– Oppsal er endå sterkare enn i fjor, og består av både spelarar frå aldersbestemt landslag og spelarar som trener med, og får speletid, i øvste divisjon.

Målskårarar, Os: Line Hjelle Berentsen 5, Mia Torp 4, Stine Eide 2, Anna Mjånes 2, Thiet Dang 2, Nora Berge, Julianne Stene, Emma Lyssand

– Stine Eide, som fylte 16 år i sommar, og nettopp har byrja å spela med oss, skåra sine to første mål for seniorlaget i denne kampen, det var veldig kjekt! synest Torp.

Stolpeskot og balltap

I tillegg til at unge Os klarte å skåra 22 mål, gler Gitte seg over at det lett kunne vore fleire skåringar og færre baklengsmål.

– Vi hadde 7-8 stolpeskot. Vi hadde òg 10-12 unødvendige balltap som førte til rush imot. Med meir rutine blir det færre slike balltap gjennom sesongen.

Gitte fortel om ei stor og treningsvillig gruppe, og seier Os absolutt skal kjempa om å ta nok poeng gjennom sesongen.

Os har no tre bortekampar på rad, mot Fana 2, NIT-HAK og Nordstrand.

Neste heimekamp går mot Rælingen 2 søndag 28. oktober.

• Terminliste og tabell