Skåra to mot Trott
Trott var nær på opprykk i fjor. Fredag fekk dei gjennomgå av Ramo Racic og Kjetil Hansen på Os 2.


Ramo Racic skåra begge måla då Os 2 slo Trott 2-0 i årets første heimekamp fredag.
- Det var ein god kamp mot eit godt lag, seier trenar Tore Nielsen.
I fjor leia Trott 2-0 ti minutt før slutt i avgjerande kamp om opprykk. Men dei starta feiringa for tidleg og kampen enda 2-2, dermed blei dei verande i 4. divisjon med andrelaget til Os.
Offside, fordel og hands
Ramo sitt første mål kom etter eit frispark i 37. minutt. Eit frispark og ei skåring som skapte nok frustrasjon hos gjestane til at gule kort blei delt ut.
- Linjemannen vinka offside på oss, men dommaren vinka vidare grunna fordel. Ein Trott-spelar fekk ikkje med seg fordel-dømminga, og tok ballen opp med nevane. Så blei det dømt hands og frispark som igjen førte til skåring, forklarar Nielsen.
Ramo skåra sitt andre mål, og kampens siste mål, i 73. minutt.
Redda to straffar!
Kjetil Hansen sto i mål heile kampen. På 2-0-leiing blei det straffe fordi han dytta ein spelar, noko strengt meinte keeperen.
- Men så redda han straffen. Og så dømte dommaren ny straffe fordi han meinte Kjetil gjekk frå streken for tidleg. Men Kjetil redda også neste straffe, to sterke prestasjonar!
Også Baste Jonassen, som spelte sentral midtbane for første gong, får skryt av trenaren. Det same gjer indreløpar Erik Kanestrøm og midtstoppar Per Søgnen Merai.
Desse spelte frå start (4-3-3): Kjetil Hansen, Tony Skarvatun (høgre back), Dani Bergstø og Per Søgnen Merai (midtstopparar), Mats Lepsøe (venstre back), Baste Jonassen (sentral midtbane), Aleksander Lindkvist (høgre indreløpar), Erik Kanestrøm (ventre indreløpar), Christer Olsen (høgre kant), Andreas Bjørnen (venstre kant) og Ramo Racic på topp.
Sven Lyssand kom inn for Bjørnen (65), Martin Eidsvik for Lindkvist (74) og Sondre Samdal for Olsen (80).
Os vann også årets første bortekamp, borte mot Osterøy (2-1).