Fotball | 09. juli 2020

Skeie i trening med Brann

– Eit tydeleg steg opp, seier Kolskogen sin tidlegare lagkamerat.

Skeie i trening med Brann
Vegard Strønen Skeie (med kapteinsbind), her då han var med og slå Brann 2 1-0 med Os i fjor. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytorsdag 09. juli 2020 14:14

Ole Martin Lekven Kolskogen, som har fått ein knallstart i Eliteserien, fekk i går selskap av tidlegare lagkamerat Vegard Strønen Skeie no på trening med Brann.

– Eg fekk beskjed før helga at Brann ville sjå nærmare på meg, måndag blei eg invitert til tre dagar med trening, fortel Vegard til Midtsiden.

– Det er veldig inspirerande det som Olis har fått til! At eg no får kjenna på nivået, bli litt kjent med trenarapparatet og vist meg litt fram, er òg veldig motiverande.

God figur

Os-trenar Endre Brenne såg på treninga onsdag.

– Eg er glad for dialogen vi har med Brann, og for at Vegard fekk denne sjansen. Vi i sportsleg utval spelte han inn, og dei sa dei kjenner til han frå før.

– Eg synest Skeie gjorde veldig god figur på treninga, han fekk vist seg fram på ein god måte. Som typar er dei litt like, Ole Martin og Vegard. Solide, treningsvillige gutar som er tøffe i hovudet og seriøse i satsinga si.

Midtstopparen sjølv seier dette gir motivasjon til endå hardare jobbing.

– Det var naturlegvis eit hakk opp frå Os, både i intensitet og i ramma rundt treningsøkta. Det er lærerikt, men eg føler eg heng med, og eg fekk fine tilbakemeldingar etter økta.

Gode ungdomsår saman

«Har trent med Kolskogen frå han var liten» skreiv Bergens Tidende etter første Brann-trening onsdag kveld. Skeie har trent med Brann torsdag formiddag og skal ned igjen på Stadion fredag formiddag.

Begge er 19 år, men av kvar sin årgang. Vegard er fødd i august år 2000, Ole Martin i januar 2001.

Dei kom saman på Os-alliansen, eit samarbeid mellom Nore Neset, der Vegard er frå, og Os Fotball, då gutane var rundt 12 år gamle.

– Vi fekk mange gode og kjekke år saman i ungdomsfotballen, den gong i kvar vår ende av banen, eg som forsvar, han som midtbane eller spiss, seier Vegard.

Debuterte saman for Os sitt A-lag

På Os sitt A-lag har dei overlappa kvarandre. Kolskogen spelte 23 kampar for Os sitt A-lag i 2017, så blei det 39 kampar for Åsane på dei to neste åra.

Vegard spelte 1 kamp for A-laget til Os i 2017, men blei ei viktig brikke og skåra 4 mål på 10 kampar som midtstoppar i delar av 2018.

Tilbake frå skade blei det 19 kampar i fjorårssesongen.

Men Skeie og Kolskogen debuterte på A-laget saman, i treningkamp mot Bjarg, vinteren 2016.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.