Skjerpa smittevern etter gjenopning som nattklubb

God stemning natt til laurdag - ventar ei meir hektisk økt i kveld.

Catten har halde ope sjølv om kranane måtte stenga ved midnatt. Denne helga er det tilbake til normalen. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøylørdag 17. okt. 2020 14:38

Fredag kunne skjenkestadane i Noreg halda kranane opne forbi midnatt igjen.

Catten Nightclub fortel om greit besøk og god stemning.

– På det meste hadde vi 65 inne. Vi ventar ei meir hektisk natt frå i kveld av, seier Bjarte Andersen.

– Kor mange har du lov å ha inne?

– Gjestane kan sitja samla, om dei kjem frå same husstand. Er det fleire grupper kan vi ta inn 126, kjem folk i større grad éin og éin tar vi inn 99 gjestar på same tid.

Redda av sportsbar og quiz

– Det er ikkje tema å gi seg, sa Andersen då dei var koronastengt på våren. Catten var rask med å opna igjen i juni, men har dei siste ni vekene mista dei tre timane når omsetnaden normalt er på topp.

Likevel har dei halde fram med å ha ope sju dagar i veka.

– Normalt er det helgene som reddar inn kvardagane, no blei det motsett.

Med osingen Kolskogen sin sterke figur på Brann og opprykk for Leeds til Premier League har United- og Liverpool-supporterane fått meir selskap.

– Godt besøk på sportsbaren har saman med quizkveldane redda inn dei tidlegare så gode nettene.

Med blanda kjensler

Trass stort tap av omsetnad, var det med blanda kjensler Bjarte i slutten på september tok imot beskjeden om skjenking etter midnatt.

– Det er klart at det ikkje har vore kjekt å mista 70.000 kroner i omsetnad i veka, for eit lite firma. Opninga fører heldigvis med seg høgare inntekt, men òg auka ansvar.

Både private festar og utestadar i Bergen har vore kjelder til smittespreiing, og til unge vaksne frå Bjørnafjorden kommune. 13 av dei 15 som er smitta i vår kommune i haust er i 20-åra.

– Det har kome nye, skjerpa smittevernrutinar frå FHI. Desse fekk vi på plass før opning i går.

Strengare vakthald for å sjekka at folk som ikkje kjem frå same gruppe held god nok avstand er blant desse.

– Folk var positive til tiltaka i natt, men vi måtte gjenta oss sjølv nokre gongar. Vi prøver å gjera det på ein hyggeleg, men bestemt måte.

– Kva med volumet på musikken? Det har vore tema andre stadar, at høg musikk kan auka sjansen for at folk står tettare rett og slett for å kunna snakka i lag.

– Det er noko av det vi har hatt som tema, og som vi vil vera observant på gjennom natta.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Knappe 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.