Skuffa, men stolt

I går deltok Fredrik Dahle Kristiansen frå Os i semifinalen i Idol, men han klarte ikkje å få nok stemmer til å ta ein av dei to plassane i finalerundane.

På Solsiden sat 10-12 kollegaer av Fredrik og såg semifinalen på storskjerm.

Stemninga var god og jentene frå Kiwi sendte 50-100 sms-ar kvar. Men då Stian Blipp ropte opp Ingrid som fjerde i siste av dei fire med flest stemmer blei dei skuffa.

– Jaja, no får vi han for oss sjølv og musikken på julebordet er redda, spøkte dei.

– Vi er stolt av Fredrik uansett. Han er knallflink og hadde ei fantastisk framføring i dag.

Når han trur han er åleine

– Eg har gått i klasse med Fredrik i seks år, så eg visste at han kunne synga. Men det gjekk lang tid før han fortalte at han hadde vore på Idol-audition, seier Malin Heggland.

Mange av kollegaene visste ikkje ein gong at han kunne synga. Men så opna dei kjøleskapet på Kiwi Moberg frå kunde-sida av skapet.

– Det viste seg at han syng når han trur han er åleine, spesielt når han er på kjølerommet og stablar mjølk, ler kollegaene.

– Ei lærerik oppleving

I går reiste Fredrik saman med dei andre deltakarane opp igjen til husværet i Frogner Apartement. I dag blei det heim igjen til Os.

– Eg er ikkje skuffa, eg er nøgd med eigen framføring og eg veit at konkurransen var hard.

– No er eg berre utruleg takksam for alle som har stemt på meg og støtta meg, seier Fredrik.

Han seier han har lært veldig mykje desse månadane frå første audition til i dag, frå å øva for seg sjølv i musikkbingen på Søfteland til å synga for fleire hundre tusen på direktesendt TV.

– Det har betydd mykje, både førebuingane til kvar runde og erfaringane med å stå på scenen. No vil eg berre kjøra på vidare med øving, skriving av låtar og å spela for andre, seier Fredrik.

Les meir om Fredrik og sjå den første musikkvideoen hans i intervju med Midtsiden frå august i år.