Skuffa over tjuveri
Laurdag planta Ågot Berge ein begonia på søstera si grav. Då ho tysdag kom for å vatna var det berre eit hol igjen.


- Eg blei så skuffa og så overraska at tårene spratt fram, seier Ågot Berge.
Laurdag formiddag planta ho ein raud begonia på søstera si grav. Tysdag gjekk ho for å vatna, men begoniaen var drege opp med rot.
- Søstera mi var ung då ho døydde, så grava ligg der dei fleste barnegravene er, aust for kyrkja mot vegen inn til sentrum. Der har dei vel fått styrt på i fred.
Berge trur det er snakk om tjuveri og ikkje hærverk.
- Eg har snakka med fleire, både andre som har graver å besøka på Os og folk som jobbar på gravplassen. Rundt jul er det visst eit problem at folk stel kransar. Tilsette i kyrkja har til og med sett folk gå i Minneparken og henta krans for å legga på grava til sine eigne.
Torsdag planta Ågot ein ny begonia på grava til søstera. No håpar ho den får stå i fred, at alle tjuvane er ferdige med å pynta til sommaren.
- Å legga tjuvgods på gravene til dine nærmaste kan ikkje vera ei god kjensle.