Skulane opnar igjen: Ber alle foreldre lesa dette

Seks veker (inkludert påskeferie) etter at skulane stengte skal 1. til 4. trinn tilbake måndag 27. april.

– Vi gler oss til å sjå elevane igjen, skriv Bjørnafjorden kommune på sine heimesider.

Kommunen seier at gjenopninga skal skje i trygge og gode former, og ber alle føresette lesa skrivet under - og begge vedlegga.

Vi trur det blir godt for elevane å kome tilbake til skulen, og med gode smitteverntiltak vil vi gjere alt vi kan for at dette skal bli trygt for elevar og tilsette.

Dei tre hovudpunkta i rettleiaren frå Utdanningsdirektoratet er:

• Sjuke personar skal ikkje vere på skulen
• God hygiene
• Redusert kontakt mellom personar

Dette blir annleis i oppstarten for å sikre godt smittevern:

• Mindre elevgrupper med færre nærkontaktar
• Auka reinhald og fokus på smittevern. Vi har laga gode rutinar for reinhald av lokale, reinhald av kontaktpunkt og reinhald på uteområda.
• Smittevernlegen tilrår at maten blir pakka inn i matpapir, slik at vi unngår å flytte matboksar mellom heim og skule. Alle elevar må ha ete frukost før dei kjem til skulen og SFO.
• Elevane skal møte opp på avtalt stad ute. Dette kjem det informasjon om frå kvar skule. Føresette skal helst ikkje bli med inn på skulen.
• Det blir lagt opp til at undervisninga kan gå føre seg ute. Skulane i Bjørnafjorden kommune følgjer den nasjonale rettleiaren om smittevern i skule.
• Elevar og vaksne med symptom på luftvegsinfeksjon, må ikkje møte på skulen. Dette gjeld òg levering og henting.
• Alle elevar og vaksne vil få grundig opplæring i handvask og hostehygiene.

SFO

• SFO vil følgje dei opningstidene som er bestemt i kommunale og lokale vedtekter.
• Skulen/SFO skal dele elevane inn i faste grupper, og på best mogleg vis knytte faste tilsette til desse. Ei gruppe (såkalla kohort) kan til dømes vere på 15 elevar. Den faste samansettinga av gruppa er det viktigaste smitteverntiltaket.
• For å sikre god planlegging av SFO-tida, treng skulane informasjon om ditt barn kjem på SFO eller ikkje komande veke. Vi ber om at du gir beskjed til skulen dersom ditt barn ikkje skal bruke SFO-plassen. Frist torsdag 23. april 2020.

Friminutt

• Skulane vil leggje til rette for at smittevernråda for skule og SFO blir følgde også i friminutt og aktivitetar.
• Dette kan bety friminutt til ulike tidspunkt for dei ulike gruppene.

Garderobesituasjon

• Skulane vil leggje til rette for at smittevernråda for skule og SFO blir følgde også i garderobesituasjonen.
• Dette kan innebere at tilsette følgjer elevane puljevis i garderoben.

Kronisk sjuke barn

• Norsk barnelegeforening meiner at dei aller fleste barn med kroniske sjukommar kan og bør gå i barnehage og skule.
• Behandlande lege skal vurdere om barnet kan vere på skulen. Meir informasjon om vurdering av barn med kronisk sjukdom finn de på legeforeininga sine nettsider.

Føresette som vel å halde barna heime frå skulen

Dersom føresette vel å halde barna heime utan at det, etter rettleiaren frå Utdanningsdirektoratet, er grunn for det, må dei sjølve ta ansvar for opplæringa av eigne barn.

Hovudregelen er at alle barn og unge har rett og plikt til grunnskuleopplæring.

«Regelverket gjør det mulig for foreldre å ta barna ut av skolen og undervise egne barn hjemme. Det er foreldrene som da har ansvaret for å gi barna opplæring, tilsvarende opplæringen i skolen. Hvis foreldrene velger hjemmeundervisning, er det viktig at de er klar over at barnet ikke lenger er en del av den offentlige grunnskoleopplæringen, og at de blir fratatt en del rettigheter etter opplæringsloven. Blant annet har barnet ikke rett til spesialundervisning eller standpunktkarakterer.

Vi vil understreke at det beste for barna er å gå på skolen, så lenge de eller familien ikke er i en risikogruppe for å få alvorlig sykdom av koronaviruset. For barn som ikke er i risikogruppa, er det trygt å gå på skolen.» Udir.no

Skuleskyss

• Skuleskyss og offentleg transport bør vi unngå om det er mogleg. Elevar som har innvilga skuleskyss vil få dette tilbodet, men vi oppmodar føresette til å køyre eigne barn.
• Dersom elevar tar skulebuss må dei hugse å halde god avstand, både mens dei ventar på bussen og inne i bussen. Det same gjeld dersom elevar nyttar annan transport til skulen.
• Elevar som har tilrettelagd skyss (taxi) må melde frå til skule og transportør om dei ikkje vil nytte denne.
• Generell informasjon
• Tilbodet for elevar 5.-7. trinn blir vidareført som før, dette gjeld barn opp til 12 år med føresette i samfunnskritiske funksjonar og barn med særskilde omsorgsbehov.

Les skriv frå smittevernoverlegen til deg som har barn i skule/SFO i Bjørnafjorden. (PDF, 206 kB)

Les skriv frå Utdanningsdirektoratet med informasjon til foreldre med barn i skulen. (PDF, 99 kB)

Hjarteleg velkomne tilbake til skulen for elevar på 1.-4. trinn!

Dei tilsette ved skulane gler seg til å treffe dykk igjen!

Brevet er signert kommunalsjef for oppvekst Line Rye og fagsjef for skule Per Olav Sørås.