Skulle øvekøyra, "glømde" læraren

Omlag 2145 torsdag kveld fekk politiet melding om ein bil som køyre merkeleg på Byvegen.

– Meldar fortalte at det gjekk opp og ned i fart og bremsing på rare stader. Bilen hadde ein L bakpå, så patrulja for ut for å ta ein kontroll, fortel konstituert politioverbetjent Sindre Lekven Hallem ved Os og Austevoll lensmannsdistrikt.

Innrømma alt

Nær Os sentrum fann patrulja bilen og stoppa den.

– I den fann vi ei kvinne fødd tidleg på 80-talet. Ho var aleine i bilen og utan førarkort, men hadde no vore ærleg nok til å setta ein L bakpå før ho la ut på ferda.

– Det held sjølvsagt ikkje. Skal ein øvekøyra så må ein også ha med seg ein som kan læra ein det, slår han fast.

Kvinna blei avhøyrd på staden og erkjente alt.

– Ho blir anmeldt for dette og vil få eit forenkla forelegg. I tillegg får ho seks månader utsetting på førarkortet om det er slik at ho var i ferd med å skulle ta det, avsluttar Hallem.