Slagkraftig start på U-Fest
Gjestane på U-Fest, som går i Oseana i heile dag, varma opp med sumoboksing før første band gjekk på scenen.
Bildeserie:
Klokka 13.30 i dag opna dørene til første versjon av U-Fest, ei av Oseana sine to nysatsingar i år.
– Vi er veldig spente, vi veit jo ikkje mykje om verken oppmøte eller om ungdomane vil lika dette tilbodet, seier Oseana-direktør Ole Tobias Lindeberg.
• Les òg: Ni timar med festival for ungdom
Mesteparten av organiseringa er det ungdomar som står for, og hos arrangørane er dei nøgde allereie etter ein halvtime.
– Klokka er berre 14, og det er allereie godt med folk her. Det vi er mest spente på er banda på scenen, at alle får bra publikum, seier Natasja Smørholm, ein av dei unge arrangørane.
– Vi held fram til rundt klokka 21, med aktivitetar, kiosksal, vrimling i foajeen og ei lang rekke med band på scenen.
– Gler oss til Vanja V
Først ut på programmet var Join Us. Seinare skal Kløver & Skarre R, Lisky, 7 Days in Alaska, Vanja V, Martine C, Simen Moesgård, Sleepwalkers og Andrea og Mathias på scenen.
– Kløver & Skarre R skal spela cirka klokka 18, men vi gler oss også veldig til Vanja V, seier ein venninnegjeng på sju som sat i foajeen og venta på første band.
– Vi blir her truleg heile dagen. Det er sosialt og det er bra at det er lagt opp til at vi òg kan sitja her og prata, det treng ikkje vera musikk heile tida. Men vi kjem til å gå inn i salen og høyra på alle!