Slik blir skulegrensene
Kor skal elevane gå når ungdomsskulene er ferdige i 2014? Slik ser kommunen det for seg.
I tenesteutvalet onsdag orienterte kommunalsjef Ingvar Torsvik om arbeidet med bygginga av dei to ungdomsskulane på Os og Nore Neset.
- Vi har hatt diskusjonar med rektorane og personalet i forhold til kva skule elevane skal gå på når dei skal byrja på ungdomsskulen.
- Det er mange omsyn å ta. Kva idrettslag er dei med i og kvar bur venane?
Administrasjonen ser for seg følgjande frå hausten 2014:
Os ungdomsskule: Elevar som går på Os, Kuventræ, Hegglandsdalen og Søfteland + dei av elevane som går på Lunde (Søre Neset) barneskule, og bur slik til at dei har innkøyring frå rundkøyringa på Moberg (ved brannstasjonen/Kiwi).
Nore Neset ungdomsskule: Elevar som går på: Halhjem, Lysekloster, Strøno, Søre øyane og dei fleste borna på Lunde barneskular, unnataken dei elevane som har bustadsadresse i Kuvågen, Brothaugen, Kuhnle.
Grensa blir altså trekt mellom Lekven og Brothaugen, om lag slik Midtsiden har skissa på bilete i denne saka.
Personale fordelt
Kommunalsjefen og fagforeningane signerte i oktober ein avtale som regulerer kor personalet på ungdomsskulane skal jobba frå hausten 2014.
- Dei som jobbar ved Os ungdomsskule er garantert stilling der.
- Personalet på dagens ungdomsskular på Søfteland og Nore Neset er garantert stilling på nye Nore Neset ungdomsskule, forklarte Torsvik.